क्रोयडन नेपाली समाजले मनायो दशैं

लन्डन । नेपालीहरु देशबाट धेरै टाढा रहेपनि आफ्नो संस्कृतिलाई बचाइराख्ने प्रयासमा लागिरहेका देखिन्छन् । यसै सिलसिलामा बेलायतको क्रोयडनमा रहेका नेपालीहरुको संस्था ‘क्रोयडन नेपाली समाज’ ले गत १३ अक्टोबरमा दशैं पार्टी सम्पन्न गरेको छ ।

सो कार्यक्रममा क्रोयडन र त्यस वरपर बसोबास गर्ने अधिकांश नेपालीको उपस्थिति थियो ।

संस्थाका अध्यक्ष नबीन कार्कीको अध्यक्षतामा भएको कार्यक्रममा संस्थाका संस्थापक अध्यक्ष ध्रुबहरि बाँस्कोटाले जहाँ जसरी रहेपनि नेपालीहरुले आफ्नो परम्परा र संस्कृति भुल्न नसक्ने बताए । करिब ५ वर्ष अगाडि स्थापित यो संस्थाले प्रत्येक वर्ष दशैं कार्यक्रम गर्ने गरेको अध्यक्ष कार्कीले जनाए ।

बिभिन्न सांस्कृतिक कार्यक्रमसहित मनाइएको सो कार्यक्रममा स्थानीय कलाकारहरुले नृत्य तथा गीत प्रस्तुत गरेर मनोरन्जन गराएका थिए भने उपस्थित पाहुनाहरु आफ्नो देश र गाउँको दशैं सम्झेर भावुक हुँदै एकापसमा शुभकामना साट्न तल्लीन थिए ।

कार्यक्रम उपाध्यक्ष रिमा कंडेलले सञ्चालन गरेकी थिइन् । क्रोयडन नेपाली समाज मनोरन्जनमा मात्र सिमित नरहेर परदेशमा आफ्नो संस्कृतिलाई जोगाउँदै आफ्ना सदस्यहरुलाई परेको दुःख अनि अप्ठ्याराहरुमा समेत सहयोग गर्दै स्थानीय निकायहरुसंग सहकार्य गर्दै आएको देखिन्छ ।

प्रतिक्रिया

सम्बन्धित सामाग्री