लण्डन । नेप्लीज ब्रिटिश कम्युनिटी युकेले दशैं शुभकामना साँझ गर्ने भएको छ। विदेशी भूमिमा पनि नेपाली राष्ट्रियता, कला तथा संस्कृतिको संरक्षण र प्रबर्द्धन गर्ने उद्देश्यले विजया दशमी २०७५ को अवसरमा यही आइतबार १४ अक्टोबर बेलुका ह्यारो फुटबल क्लबमा कार्यक्रम हुने आयोजकले बताएका छन्।
लन्डन कविता कन्सर्ट लगायतका विविध गतिविधि गर्दै आएको एनबिसी युकेले दशैंको उपलक्ष्यमा सांस्कृतिक कार्यक्रम गर्न लागेको संस्थाका अध्यक्ष मिलन घिमिरेले बताए।
बेलायतकालागि नेपाली राजदूत डा. दुर्गाबहादुर सुवेदी प्रमुख अतिथि रहेको सो कार्यक्रममा नेपालका लोकप्रिय हास्य कलाकार शैलेन्द्र सिंखडाको विशेष प्रस्तुति हुनेछ। त्यस्तै स्थानीय कलाकारहरुले पनि रोचक नृत्य प्रस्तुत गर्नेछन् ।
सोही अवसरमा यो वर्ष जीसीएससी तथा ए लेभल पुरा गरेका भाइबहिनीहरुलाई कदरपत्र प्रदान गर्ने कार्यक्रमसहित रात्रीभोजको पनि व्यवस्था गरिएको छ।
“दशैंजस्तो महत्वपूर्ण चाडमा सपरिवार भेला भएर रमाइलो गर्न र हाम्रा नानीहरुलाई हाम्रो संस्कृतिका बारे सिकाउन पनि यो कार्यक्रम गरिएको हो,” घिमिरेले भने ।
