काठमाडौँ- विश्वकप फुटबल – २०१८ को उपाधि फ्रान्सले जितेको छ । रुसको सेन्ट मस्कोस्थित लुजनिकी रङ्गशालामा अाइतबार सम्पन्न फाइनल खेलमा युरोपेली राष्ट्र फ्रान्सले युरोपकै क्रोएसियालाई ४–२ गोल अन्तरले हराउँदै सन् १९९८ पछि दोस्रो पटक विश्वकप फुटबलको च्याम्पियन बनेको हो ।
१८औँ मिनेटमा फ्रान्सका जिग्रम्यानले प्रहार गरेको फ्रिकिक राेक्ने क्रममा क्रोएसियाका मारियो मान्जुकिकले आफ्नै पोष्टमा आत्मघाती गोल गरेका थिए ।
खेलको २८औँ मिनेटमा क्रोएसियाका इभान पेरिसिकले गोल गर्दै खेललाई बराबरी गरेका थिए । डिबक्स भित्र डिफेन्डर भिडाले दिएको पासमा इभान पेरिसिकले उत्कृष्ट गोल गर्दै खेललाई १-१ को अवस्थामा ल्याएका थिए । पेरिसिकको यो विश्वकपको तेस्रो गोल हो ।
३८ मिनेटमा फ्रान्सले दोस्रो पटक अग्रता लिन सफल भोय । कर्नर बलमा पेरिसिकले ह्यान्ड गरेपछि रेफ्रीले भिएआर रिभ्यूमार्फत पेनाल्टी दिने निर्णय गरेका थिए। एन्टोनी ग्रिजम्यानले पेनाल्टी मार्फत गोल गरी २–१ को स्थितिमा पुरयाएका थिए ।
मध्यान्तरपछिको खेलमा पाउल पोग्बाले फ्रान्सका लागि तेस्रो गोल गरे । केलियन एमबाप्पेले ६५औँ मिनेटमा डिबक्स नजिकबाट फ्रान्सका लागि चौथो गोल गरे । खेलको ६९औँ मिनेटमा क्रोएसियाका मान्जुकिकले गोल गरे पनि हारलाई भने टार्न सकेनन् ।
फ्रान्सले यसअघि सन् १९९८ मा आफ्नै भूमिमा पहिलो पटक विश्वकप फुटबलको उपाधि जितेको थियो । युरोपको सानो राष्ट्र क्रोएसिया भने पहिलो पटक उपाधिका लागि भिडेको हो ।
यसअघि सेमिफाइनलमा फ्रान्सले बेल्जियमलाई १–० ले पराजित गरेको थियो भने क्रोएसियाले बेलायतलाई २–१ गोलअन्तरले हराउँदै फाइनलमा स्थान सुरक्षित गरेको थियो ।
यसैगरी विश्वकप २०१८ मा चार उत्कृष्ट गोल गरेका फ्रान्सका खेलाडी केलियम एमबाप्पे उत्कृष्ट युवा खेलाडी घोषित भए । १९ वर्षीय एमबाप्पेले फाइनलमा समेत एक गोल गरेका थिए ।
यस्तै, प्रतियोगिताका उत्कृष्ट खेलाडी घोषित भएका क्रोसियाका कप्तान लुका मोड्रिचले गोल्डेन बल पाए । उनले प्रतियोगिताभर उत्कृष्ट प्रदर्शन गरेका थिए । गोल्डेन ग्लोब्स भने बेल्जियमका गोलकिपर थिवाउट कोर्टिजले गोल्डेन ग्लोभ्स हात पारे ।
६ गोल गरेका बेलायतका स्टाइकर हेरी केनले गोल्डेन बुट जिते ।
क्रोएसिया अनपेक्षित परिणाम निकाल्दै फाइनलमा पुगेको थियो । ब्राजिल, जर्मनी, स्पेन, अर्जेन्टिना जस्ता विश्वकप उपाधि जितिसकेका हस्तीहरु पराजित भई घर फर्केको अवस्थामा क्रोएसिया सबैलाई चकित पार्दै उपाधिको दाबेदार बनेको थियो । तर, फाइनलमा उसले फ्रान्सको तगारो पार गर्न सकेन ।
