लुम्बिनीलाई एशियाको बृहत्तर तीर्थस्थलका रुपमा स्थापना गर्न जोड

रुपन्देही, १६ वैशाख – अन्तर्राष्ट्रिय बौद्ध सम्मेलन लुम्बिनीलाई एशियाको बृहत्तर तीर्थस्थलको परिपथका रुपमा स्थापना गर्न जोड दिँदै १० बुँदे घोषणापत्र जारी गरी आज समापन भएको छ ।

लुम्बिनीमा दुई दिनसम्म सञ्चालन भएको सम्मेलनले मानवजातिको अन्तरआस्था र शान्ति संवादका लागि अन्तर्राष्ट्रिय केन्द्रका रुपमा विकास गर्नुपर्नेमा जोड दिएको छ । भारतको बोधगया, सारनाथ र कुशीनगर तथा श्रीलंका, म्यानमार, चीन, पाकिस्तान र बंगलादेशको बौद्ध सम्पदालाई प्रवर्धन गर्न घोषणापत्रमा जोड दिइएको छ ।

बौद्ध शिक्षाका लागि लुम्बिनीलाई विश्व केन्द्रका रुपमा विकास गर्न जोड दिँदै सम्मेलनले विश्व बौद्धमार्गी मञ्च स्थापना गरी बौद्ध परम्पराको सञ्जालका लागि शुभारम्भ गरिने जनाइएको छ । विश्व समुदायलाई बढ्दो हिंसा, असहिष्णुता र द्वन्द्व अन्त्यका लागि सम्बोधन गर्न आह्वान गर्दै सम्मेलनले दिगो विश्व शान्तिका निम्ति बुद्धको शिक्षालाई अवलम्वन गर्दै अन्तरआस्था, सहयोग र सदाचारलाई प्रवर्धन गर्दै रणनीति तर्जुमा गर्नमा जोड दिएको छ ।

लुम्बिनीलाई विश्व शान्तिको केन्द्रका रुपमा विकास गर्ने तथा धार्मिक र धर्मनिरपेक्ष नेतालाई एकै थलामा ल्याएर गरीबीबाट उन्मुक्ति दिलाउनका लागि नेपाल सरकार र संयुक्त राष्ट्रसंघको दृष्टिकोण अघि बढाउन सम्मेलनमा सहभागी बौद्ध विद्वान् सहमत भएका छन् ।

जापानका प्रा केन्जो टाँगेद्वारा तयार गरिएको लुम्बिनी गुरुयोजनालाई शान्ति र मानवताको विश्व केन्द्रका रुपमा सम्पन्न गर्नेमा समेत सम्मेलनले जोड दिएको छ ।

सम्मेलनमा २३ देशका बौद्ध धर्मगुरु, वरिष्ठ भिक्षु र बौद्ध विद्वानले बौद्ध धर्म, संस्कृति, साहित्य र दर्शनसम्बन्धी विभिन्न कार्यपत्र प्रस्तुत गरी छलफल भएको थियो । पूर्व संस्कृति, पर्यटन तथा नागरिक उड्डयनमन्त्री आनन्दप्रसाद पोखरेलले बौद्ध दर्शन संस्कृति र धर्म मात्रै नभई मानवजातिको समृद्धिको आधारस्तम्भ भएको उल्लेख गर्नुभयो ।

लुम्बिनीलाई अन्तर्राष्ट्रिय शान्ति शहरका रुपमा विकास गरिने 

प्रधानमन्त्री केपी शर्मा ओलीले गौतम बुद्धको जन्मस्थल लुम्बिनीलाई बौद्ध धर्मको उद्गमस्थलका रुपमा विश्वसमक्ष प्रस्तुत गर्नुपर्नेमा जोड दिनुभएको छ ।

उहाँले त्यसका लागि अध्ययन, अनुसन्धान तथा विज्ञहरु सक्रियतापूर्वक बुद्ध दर्शन तथा बौद्ध साहित्यको प्रचारप्रसारमा लाग्नुपर्नेमा जोड दिनुभएको छ ।

बुद्ध जन्मस्थल लुम्बिनीमा दुई दिनसम्म चलेको अन्तर्राष्ट्रिय बौद्ध सम्मेलनको आज समापन समारोहलाई सम्बोधन गर्नुहुँदै प्रधानमन्त्री ओलीले सरकारले लुम्बिनीलाई अन्तर्राष्ट्रिय शान्ति शहरका रुपमा विकास गर्न चाहेको समेत बताउनुभयो ।

प्रधानमन्त्री ओलीले बुद्ध दर्शन तथा यसमा इच्छा, विश्वास तथा लगाव राख्ने सबै मानव जातिका लागि पवित्र पुण्यस्थल बनाउने बताउँदै विश्वलाई अँध्यारोबाट हटाउनका लागि बुद्ध र बुद्धको दर्शनले महत्वपूर्ण टेवा पुरयाएको समेत बताउनुभयो । यस क्षेत्रको समग्र विकासका लागि विश्व समुदायको सहयोग आवश्यक रहेको भन्दै उहाँले आउँदा दिनमा सबै क्षेत्रको सहयोग प्राप्त हुने विश्वास व्यक्त गर्नुभयो ।

लुम्बिनी गुरुयोजना समयमै पूरा गर्न सरकार प्रतिबद्ध रहेको उल्लेख गर्दै पुरातत्व क्षेत्रको उत्खनन र संरक्षणमा लाग्दै बृहत्तर लुम्बिनीलाई अगाडि बढाइने बताउनुभयो ।

प्रधानमन्त्री ओलीले ‘आफ्नो नेतृत्वको सरकार समृद्ध नेपाल, सुखी नेपाली’ भन्ने नारालाई चरितार्थ गर्ने मुख्य उद्देश्यका साथ अगाडि बढेको समेत बताउनुभयो । यस्ता सम्मेलनले सरकारको प्रतिबद्धता अगाडि बढाउनका लागि प्रेरणा मिल्ने उल्लेख गर्दै उहाँले वैशाख पूर्णिमाका अवसरमा ज्ञान प्राप्ति तथा विश्वका अमर छोरा अत्यन्त शान्त आत्मामा सम्मिलित भएको स्मरण गर्नुभयो ।

उहाँले शान्त, सौहाद्र, समझदारी, संयमता र न्यायिक विश्वमा सँगसँगै काम गर्ने प्रतिबद्धता व्यक्त गर्नुभयो । प्रधानमन्त्री ओलीले सम्मेलनमा विश्व शान्तिका महान् देवदूतको स्मरण र सम्मान गर्दै नेपालले शान्तिपूर्वक राजनीतिक परिवर्तन गर्न सफल भएकोप्रति गर्वित हुनुपर्ने बताउनुभयो ।

शान्ति प्रक्रियामार्फत लोकतान्त्रिक प्रक्रियाबाट संविधान निर्माणजस्तो ऐतिहासिक कार्य सम्पन्न गर्न सफल भएको उल्लेख गर्दै उहाँले तीनै चरणको निर्वाचन सम्पन्न गरी मुलुक शान्ति र समृद्धिको बाटोमा अघि बढेको बताउनुभयो ।

इतिहासमा नै पहिलोपटक प्रजातान्त्रिक प्रक्रियाबाट शक्तिशाली सरकार निर्वाचित भएको उल्लेख गर्दै प्रधानमन्त्री ओलीले जनताले सरकारबाट सहज जीवनयापनको सपनालाई वास्तविकता पाउने सदिच्छा व्यक्त गरेको बताउनुभयो ।