लन्डन । नेपाल आदिवासी जनजाति महिला महासंघ
बेलायतले गत आइतबार एक च्यारिटी डिनर गरी दुई लाख रुपैयां संकलन गरेको छ ।
संयुक्त अनाथ तथा अपांग एकता केन्द्र नेपाल र पर्वतारोही पत्रकार देउराली चाम्लिङको सगरमाथा आरोहण अभियानका लागि सहयोग संकलन गर्न उक्त च्यारिटी डिनर गरिएको महिला महासंघकी अध्यक्ष श्रीमती विमला कुमारी राईले बताइन् ।
लन्डन साउथ हयारोस्थित गोल्डनसिप रेष्टुरांमा सम्पन्न च्यारिटी डिनर सफल पार्न आदिवासी जनजाति महासंघ (नेफिन) यूके र आदिवासी जनजाति पत्रकार महासंघ (फोनिज) यूकेको विशेष सहायता थियो ।
कार्यक्रममा बेलायतस्थित विभिन्न जातीय संघसंस्थाका प्रतिनिधिहरु, पत्रकार र समाजसेवीको उपस्थिति थियो । कार्यक्रमको पहिलो सत्र महासचिव वसुन्धरा याख्खा र दोश्रो सत्रको सांस्कृतिक कार्यक्रम कर्मा पहाडीले सञ्चालन गरेका थिए ।
कार्यक्रमका प्रमुख अतिथि नेपाली आदिवासी जनजाति महासंघ (नेफिन) यूकेका अध्यक्ष तुल छन्त्यालले महिला महासंघले गरेको पवित्र कार्यका लागि धन्यवाद दिंदै भविष्यका प्रयासहरुमा पनि नेफिन यूकेको सहयोग रहने प्रतिवद्धता व्यक्त गरे ।
कार्यक्रम समापन गर्ने क्रममा अध्यक्ष श्रीमती विमला राईले च्यारिटी डिनर सफल पार्न सहयोग गर्ने कार्यसमितिका सहकर्मीहरु, नेफिन यूके, फोनिज यूके, दाताहरु र उपस्थित सबैलाई धन्यवाद दिंदै भविष्यमा पनि यस्तै सहयोगको अपेक्षा राखेको बताइन् ।
