सन्दीप बने आइपिएल खेल्ने पहिलो नेपाली क्रिकेटर, ३२ लाखमा दिल्लीले किन्यो

काठमाडौं–इण्डियन प्रिमियर लिग (आइपिएल) मा पहिलो पटक खेल्ने नेपाली क्रिकेटरको इतिहास स्पीनर सन्दीप लामिछानेले बनाएका छन् । आइतबार भएको आइपीएलको अक्सनमा उनलाई ३२ लाख नेपाली रुपैयाँमा डिल्ली डेयरडेभिल्सले अनुबन्ध गरेको हो ।

१७ वर्षीय नेपाली क्रिकेटर सन्दीपलाई किन्न २० लाख भारु न्यूनतम पारिश्रमिक तोकिएको थियो । दिल्लीले सोही रकममा सन्दीपलाई किनेको हो ।

सन्दीपले २०१६ को यु–१९ विश्वकपमा ह्याट्रिक लिदैं तहल्का मच्चाएका थिए । उनले यु–१९ मा आयरल्याण्ड विरुद्ध हयाट्रिक लिएका थिए । नेपाललाई आफ्नो प्रभावशाली प्रदर्शन जिताएको उक्त खेलमा सन्दीपले ५ विकेट झारेका थिए ।

यो शानदार प्रदर्शनपछि सन्दीपले आफ्नो स्पीन बलको जादूको मोहमा अष्ट्रेलियाका पूर्व कप्तान माइकल क्लार्कलाई समेत पारेका थिए । सन्दीप अष्ट्रेलियामा पुगेर माइकल क्लार्कको एकेडेमीमा तालिम समेत लिएका थिए ।

उनलाई दिल्लीले मैदानमा उतार्छ कि उतार्दैन् त्यो भने हेर्न बाँकी नै छ । तर, दिल्लीमा अनुबन्ध भएसँगै सन्दीप नेपालबाट आइपिएल खेल्ने पहिलो क्रिकेटर बनेका छन् ।

आइपिएलजस्तो प्रतिष्ठित प्रतियोगितामा नेपालजस्तो एसोसियट देशका खेलाडीहरुलाई खेल्ने दुर्लभ अवसर मिल्छ । सन्दीप त्यही दुर्लभ अवसर पाउने भाग्यमानी क्रिकेटर बनेका छन् ।