लन्डन – बेलायतको उत्तरी आयरल्याण्ड मन्त्री जेम्स ब्रोकेन्साएरले राजीनामा दिएका छन् । स्वास्थ्य समस्या देखाउँदै उनले सोमबार राजीनामा दिएको अधिकारीहरुले जानकारी दिएका छन् । ब्रोकेन्साएरले प्रधानमन्त्री टेरेजा मेलाई बुझाएको राजीनामा पत्रमा आफ्नो शल्यक्रिया गर्नुपर्ने भएकाले राजीनामा दिएको उल्लेख छ ।
‘मेरो दाहिने श्वासनलीमा सानो चोट देखिएको छ, त्यसलाई तत्काल उपचार गर्नुपर्ने भएको छ’- उनले राजीनामा पत्रमा लेखेका छन्- ‘त्यसैले अहिले मेरो प्राथमिकता मेरो स्वास्थ्य र परिवार नै भएको छ ।’
प्रधानमन्त्री मेले मन्त्री परिषद्का सदस्यहरु हेरफेर गरेकै दिन मन्त्री ब्रोकेन्साएरले स्वास्थ्यको समस्या देखाउदै राजीनामा दिएका हुन् ।
मेले मन्त्री परिषद्का धेरै जनालाई हेरफेर गर्ने अनुमान भइरहेका बेला सोमबार आफ्नो कन्जरभेटीभ पार्टीका अध्यक्षलाई नै हटाएकी छन् । प्रधानमन्त्री मेले जुनमा भएको आम निर्वाचनमा पार्टीको कमजोर अवस्था देखिएकाले अध्यक्ष ब्रान्डोन लेविसलाई मन्त्रीबाट हटाएकी छन् ।
लेविसको सट्टा प्याट्रीक म्याक लौघलिनलाई जिम्मेवारी दिइएको प्रधानमन्त्री कार्यालयका अधिकारीहरुले जनाएका छन् ।
