पहिचान पुरस्कारका लागि सात कृति छनौट

लण्डन । पहिचान पुरस्कार कोषले हरेक वर्ष प्रदान गर्ने पहिचान पुरस्कारका लागि यसवर्ष सातवटा कृति छनौट भएका छन् ।
पुरस्कारका संस्थापक नरेश काङमाङ राईका अनुसार छनौट भएका कृतिहरुमा यज्ञशको भुइँया, सरिता तिवारीको प्रश्नहरुको कारखाना, युग पाठकको माङ्गेना, श्याम सिंगकको रेमिटल्याण्ड, नविन विभाषको रोल्पा सुइना, सचित राईको माङखिम, र राज माङलाकको लिम्बुनी गाउँ रहेका छन् ।
लेखनको माध्यमबाट पहिचानको मुद्दालाई जीवन्तता दिन नेपाली साहित्य, संस्कृति र कलामा पहिचानसम्बन्धी लेखिएका पुस्तकलाई सम्मान र पुरस्कृत गर्न सो पुरस्कारको स्थापना भएको हो ।
सो पुरस्कारको राशी २ लाख २ हजार २ रुपियाँ रहेको छ । यसअघि सो पुरस्कारबाट राजन मुकारुङको फेरिँदो सौन्दर्य र अर्जुन खालिङको गोयाङको सुगन्ध पुरस्कृत भएका छन् ।
नेपाली साहित्यलाई सम्बृद्ध बनाउन, पहिचानसम्बन्धी अनुसन्धान र लेखनलाई सक्रिय बनाउन, पुरानो मनोविज्ञान भत्काई नयाँ बहुल समाज निर्माण गर्न पुरस्कार स्थापना गरिएको संस्थापक काङमाङ बताउँछन् ।
पुरस्कारको राशी हरेक पाँच वर्षमा वृद्धि गरिने पनि कोषले जनाएको छ ।