लन्डन । बेलायती प्रधानमन्त्री टेरेजा मे साउदी अरबको भ्रमण पुरा गरी फर्किएकी छन् । मेको भ्रमणले दुई देशबीचको सम्वन्ध थप बलियो बनाउन सफल भएको जनाइएको छ । साउदी अरब बेलायतका लागि यस क्षेत्रको सबैभन्दा ठूलो व्यापारिक साझेदार हो ।
प्रधानमन्त्री मेले रियादमा रहँदा साउदीका राजा सल्मान विन अब्दुलाजिज र राजकुमार मोहम्मद विन सल्मानसंग भेटवार्ता गरेकी थिइन् । भेटवार्ताका क्रममा उनीहरुले दुई देशको सम्बन्धका साथै क्षेत्रीय विकासमा समेत जोड दिएको उच्च अधिकारीहरुले जानकारी दिएका छन् ।
प्रधानमन्त्री मेले राजा र राजकुमारसंग सिरिया संकट, यमनमा भइरहेको युद्ध र मध्य पूर्वमा भइरहेको शान्ति प्रक्रियाको पहलकदमी लगायतका विषयमा पनि छलफल गरेको बताइएको छ ।
मध्यपूर्वको भ्रमणका क्रममा इराकको आकष्मिक भ्रमणपछि प्रधानमन्त्री मे साउदी अरबको भ्रमणमा गएकी थिइन् । उनले इराकी प्रधानमन्त्री हैदर अल अबादीसंगको भेटमा इस्लामिक स्टेट (आइएस) लडाकु विरुद्धको कारबाही अभियानकाबारे चासो दिएको समाचारमा उल्लेख छ ।
