लन्डन । राष्ट्रिय योजना आयोगका पूर्व उपाध्यक्ष प्रा. पिताम्बर शर्माले बेलायत नेपाल प्रज्ञा परिषदको १५ औं वार्षिक नेपाल प्रवचन दिने भएका छन् ।
आउंदो २३ नोभेम्बर बिहीबार बेलुका लन्डनस्थित स्कुल अफ ओरियण्टल एण्ड अफ्रिकन स्टडीज (सोआस) मा आयोजना हुने कार्यक्रममा प्रा. शर्माले ‘नेपालको संघीयता र विकास रणनीति’ बारे आफ्नो विचार राख्ने परिषदले जनाएको छ ।
नेपालको संविधान २०१५ अनुसार पहिलोपटक संघीय संसद तथा प्रान्तीय विधानसभाहरुको चुनाव भइरहेका बेला संघीयताका चुनौती र नेपालको भावी विकास रणनीतिबारे प्रा. शर्माका विचारहरु निकै उपयोगी हुने आयोजक संस्थाको विश्वास छ ।
बेलायत नेपाल प्रज्ञा परिषदका महासचिव डा कृष्ण अधिकारीले भनेका छन्, ‘दश वर्षे जनयुद्ध र त्यतिनै समय द्वान्द्वोत्तर व्यवस्थापनमा खर्चेको नेपालको लागि संघीयता, स्थानीय स्वशासन र सन्तुलित क्षेत्रीय विकास अहिलेका टड्कारा चुनौतीहरू हुन् । यति ठूलो संघर्ष गरेर प्राप्त उपलब्धिहरूको कार्यान्वयन कसरी होला भन्ने आम नेपाली र नेपालका हितैषीहरुको चासोको विषय हो । यस्तो समसामयिक विषयमा लन्डनमा प्राज्ञिक प्रवचन र छलफल हुन लागेकाले म सबैलाई सहभागिताका लागि आग्रह गर्दछु ।’
स्थानीय संरचना र शासन व्यवस्थालाई व्यवहारिक कार्यान्वयन कसरी गर्ने भन्ने विषयमा अध्ययनरत उच्चस्तरीय समितिका अध्यक्षसमेत रहेका योजना आयोगका पूर्व उपाध्यक्ष प्राध्यापक शर्माका अनुसन्धान र अनुभवबाट खारिएका सारगर्भित विचार सुन्ने र छलफल गर्ने मौका यसपालीको नेपाल प्रवचनले जुटाइ दिएको हो । अधिकारीले बेलायतका नेपाली र नेपालसम्बन्धी चासो राख्ने प्रवुद्ध व्यक्तिलाई यो अवसरको सदुपयोग गर्न आग्रह गरेका छन् ।
सबैका लागि खुला उक्त कार्यक्रममा रिसेप्सन सांझ ५.३० बजे तथा प्रवचन एवं प्रश्नोत्तर ६.३० देखि ८.०० बजेसम्म हुने जनाइएको छ ।
सोआसकै साउथ एसियन इन्स्टिच्युटको आतिथ्य र समाजसेवी तथा व्यवसायी महन्त श्रेष्ठको सहयोगमा कार्यक्रम हुन लागेको बताइएको छ ।
थप जानकारीकालागि:
[email protected] or [email protected]
Website: www.bnac.ac.uk https://www.facebook.com/BNAC.UK https://twitter.com/BNAC2014
