लन्डन । पर्यटकीय नगरी पोखराको धम्पुसमा आगामी साताबाट हट एयर बेलुनको व्यवसायिक उडान शुरु हुने भएको छ । बेलुन प्रा.लि. ले नेपालका लागि पृथक उक्त उडान (साहसिक खेल) शुरुवात गर्न लागेको हो । उक्त व्यवसायमा हिमालयन ग्लोबल इन्भेस्टमेन्टका तर्फबाट एनआरएनए यूके पूर्व कोषाध्यक्ष एवं बुद्ध फाउण्डेशन यूकेका अध्यक्ष दीपक श्रेष्ठको समेत लगानी छ । श्रेष्ठले हट एयर बेलुनमा बसेर मनोरम अन्नपूर्ण हिमश्रृंखला एवं पर्यटकीय नगरी पोखराको दृश्यावलोकन गर्न सकिने जनाउंदै गैर आवासीय नेपालीलाई होलिडे मनाउन गएका बेला यसको पनि रसस्वादन गर्न सुझाएका छन् ।
पर्यटकीय नगरी पोखराको धम्पुसबाट उडान शुरु गरी मार्दी खोलाको तीरमा अवतरण गराइने श्रेष्ठले जनाए । हट एयर बेलुन उडान शुरु गर्न बेलुन प्रा.लि.ले नागरिक उड्ययन प्राधिकरणबाट इजाजत लिइसकेको छ । एक वर्षका लागि रेड बुल संग समेत सहकार्यको सम्झौता गरिएको छ ।
प्रतिव्यक्ति ८ हजार ५ सय रुपैंया शुल्क लिई एकपटकमा ६ जना पर्यटकलाई आधा घण्टा उडान गराउने व्यवस्था मिलाइएको युवा व्यवसायी श्रेष्ठले जानकारी दिए । उनले बेलुन उडानका लागि चीनबाट तालिमप्राप्त दक्ष पाइलटको व्यवस्था मिलाइएको पनि बताए । पूर्ण सुरक्षासहित मनोरन्जन प्रदान गराउन तत्काल करिव एक करोड रुपैयांको लगानीमा अमेरिकाको एडम्स बेलुन कम्पनीसंग बेलुन खरिद गरिएको छ । त्यस्तै ग्राउण्ड हयाण्डलिङका लागि भारतबाट प्राविधिकको पनि व्यवस्था मिलाइएको जानकारी कम्पनीले दिएको छ ।
निकट भविष्यमा स्थानीय व्यक्तिहरुलाई तालिममार्फत दक्ष बनाई नेपालमै हट एयर बेलुनको व्यवसायिक उडानका लागि जनशक्ति तयार गर्ने लक्ष्य राखिएको कम्पनीले जनाएको छ ।
साउथ इष्ट लन्डनवासी दीपक श्रेष्ठले समाजसेवा र व्यवसाय समानान्तर रुपमा अगाडि बढाएका छन् । ‘नेपाल आर्थिक समृद्धिको बाटोमा अग्रसर भइरहेका बेला हामी विदेशमा रहेका गैर आवासीय नेपालीले मातृभूमिका लागि सानो ठूलो लगानी वा सीप दिन सक्छौं’, श्रेष्ठले भने । श्रेष्ठले पछिल्लो समय नेपाली फिल्म निर्माणमा पनि लगानी गरेका छन् भने उनको लन्डनमा पनि व्यवसाय छ ।
