काठमाडौँ । शनिबारदेखि काठमाडौँमा हुने एनआरएन विश्व सम्मेलनमा युकेबाट विभिन्न पदमा उम्मेदवारी दिएका उम्मेदवारहरुलाई जिताउन एनआरएनए युकेले पहल गर्ने भएको छ ।
एनआरएनए युकेका अध्यक्ष योगकुमार फगामीको अध्यक्षतामा काठमाडौँको न्यूरोडमा शुक्रबार बेलुकी भएको एक कार्यक्रममा सो घोषणा गरिएको हो ।
कार्यक्रममा युकेबाट उपाध्यक्ष पदमा उम्मेदवार बनेका कुल आचार्य, कोषाध्यक्षका उम्मेदवार मुच्छेत्र गुरुङ, सह-कोषाध्यक्ष उम्मेदवार सोम सापकोटा, युरोप संयोजक थर्क सेन, सहसंयोजक विजन भट्टलगायतले आफूलाई जिताउन अपील गरेका थिए । युकेबाट उनीहरुका साथै विश्वासदीप तिगेला सचिव पदमा, हेमन्त सेढाइँ युरोप सहसंयोजक पदमा र संगीता मरहठ्ठा युरोपको महिला सहसंयोजकमा उठ्ने चर्चा छ ।
कार्यक्रममा एनआरएनए युके अध्यक्ष योगकुमार फगामीले एनआरएनए युकेले युकेबाट उम्मेदवारी दिन लागेका साथीहरुलाई दिल खोलेर जिताउन सहयोग गर्ने बताए । उनले युकेबाट आएका प्रतिनिधिहरुलाई आफ्ना देशका उम्मेदवारलाई जिताउन लागि पर्न पनि अनुरोध गरे । उनले निर्वाचनका बारेमा एनआरएनए युकेको आधिकारिक धारणा प्रवक्तामार्फत आउने जानकारी दिँदै अरु पदाधिकारी र सदस्यहरुले दिएको धारणा व्यक्तिगत मात्र हुने स्मरण गराए ।
कार्यक्रममा उपस्थित महासचिवका उम्मेदवार त्रिलोक गुरुङ, युरोप संयोजकका उम्मेदवार प्रेम गुरुङ र उपसंयोजकका उम्मेदवार भीम ‘कमल’ केसीले पनि सहयोगका लागि अनुरोध गरेका थिए । कार्यक्रममा स्वागत मन्तब्य महासचिव राजकुमार त्रिपाठी र धन्यवाद ज्ञापन उपाध्यक्ष प्रेम गाहाले गरेका थिए भने संचालन प्रवक्ता रमेश साराङकोटीले गरेका थिए ।
कार्यक्रममा एनआरएन युकेका संरक्षकहरु, सल्लाहकारहरु, पूर्व र वर्तमान कार्यसमितिका नेतृत्वगण तथा प्रतिनिधिहरुको उपस्थिति रहेको थियो ।
