वाइन चखाउन जर्मनीदेखि बेलायतसम्म

लन्डन । नेपाली समाजमा ‘वाइन कल्चर’ अझै आइसकेको छैन् । विदेशमा बस्ने नेपालीले ‘सोसलाइज’ हुन बेला बेला वाइन पिउने संस्कार अपनाएपनि नेपालकै सन्दर्भमा भने यो अलिक परको कुरा छ । अझ महिलाले वाइन वा अल्कोहल पिउंदा समाजले राम्रो ठान्दैन । यो वास्तविकताबीच जीना मास्के भने नेपाली समुदायमा ‘वाइन कल्चर’ भित्रयाउन निरन्तर जुटिरहेकी छन् । हाल जर्मनीको गाइजेन्हाइम युर्निभर्सिटीमा वाइन विषयमा स्नातक गरिरहेकी छन् जीना । उक्त विश्वविद्यालय रेन्गाउमा अवस्थित छ, जुन रेज्लिङ वाइनका लागि निक्कै प्रख्यात छ ।

जीना गत साता जर्मनीबाट लन्डन आइन ‘वाइन टेस्टिङ’ का लागि । बेलायतमा रहेका नेपालीलाई वाइनबारे जानकारी दिने उनको उद्देश्य थियो । उनले साउथ हयारोस्थित गोल्डेनसीप रेष्टुरेन्ट र भेन्यू फाइभ रेष्टुरेन्टमा ‘वाइन टेस्टिङ’ गराउंदै वाइन कसरी उत्पादन हुन्छ ? पिउने र ग्लास समाउने तरिका, वाइनको स्वास्थ्यका लागि सकारात्मक पक्ष आदिबारे वाइन सेवनकर्तालाई अवगत गराइन् । जीनाले नेपाली र एसियन स्पाइसयुक्त खानासंग पिउन उचित हुने रेज्लिङ फेनहर्ब, स्प्याटलिज, सिल्भानेर, स्पाटबर्गन्डेर वाइनहरु टेस्टिङ गराएकी थिइन् । ति सबै स्टेफन ब्रुअर वाइनरीबाट उत्पादित वाइन हुन्, जससंग जीना आवद्ध छन् । निकट भविष्यमा ति वाइन बेलायती बजारमा समेत ल्याउन गृहकार्य भइरहेको जीनाले बताइन् । आगामी जनवरीमा फेरि लन्डन आएर वृहत रुपमा वाइन टेस्टिङ गराउने योजना जीनाको छ ।

काठमाडौं र बेलायतबाट होटल म्यानेजमेन्टमा स्नातकसम्मको अध्ययन पुरा गरेकी जीना हस्पिटालिटी क्षेत्रमा पोख्त छिन् । उनले बेलायत र युएइमा होटलमा लामो समय काम गरेको सुनाइन् । बेलायतको राजपरिवारलाई वाइन सप्लाइ गर्दै आएको फिल्क वाइनरी कम्पनीमा ६ महिनाको इन्टर्नसिप समेत गरेको उनले बताइन् ।