८ वर्षपछि नेपाली जनसम्पर्क समिति बेलायतमा नयां नेतृत्व चयन

लन्डन । करिब ८ वर्षपछि नेपाली जनसम्पर्क समिति बेलायतले नयां नेतृत्व पाएको छ । शनिबार लन्डनमा सम्पन्न चौंथो एकता अधिवेशनले युवराज गुरुङको सभापतित्वमा ४७ सदस्यीय जम्बो नयां कार्यसमिति सर्वसम्मत चयन गरेको हो । गुट उपगुट र विभाजनका कारण लामो समयसम्म समितिको अधिवेशन हुन सकेको थिएन । दुई ध्रुवमा विभाजित संस्थापन पक्षका लोक गुरुङ र विज्ञान प्रसाईं समूहका बराबर पदाधिकारी र सदस्यहरु बांडफांड गर्ने गरि सहमति भएको हो । जनसम्पर्क समितिले भागवण्डाको नाममा सबैलाई राखेर एनआरएनए यूकेको कीर्तिमान पनि जितेको छ ।

‘गिभ एण्ड टेकमा केही असन्तुष्टि रहेपनि सबैलाई समेटेर संगठन एक ढिक्का बनाउने प्रस्ताव हामीले स्वीकारयौं’, प्रसाईंले वीनेपालीसंग भने । यसअघि प्रसाईं समूहले अधिवेशन बहिष्कार गर्ने चेतावनी दिंदै आएको थियो ।

विधान संशोधन गरेर पदाधिकारी थप्दै यसपटक ४७ सदस्यीय कार्यसमिति बनाइएपनि आगामी अधिवेशन भने नेपाली कांग्रेसको विधानकै संरचनाभित्र गर्ने सैद्धान्तिक सहमति भएको छ ।

नेपाली कांग्रेसका केन्द्रिय प्रतिनिधि सुरेन्द्र पाण्डे, एनपी साउद, कांग्रेस सांसद बहादुर सिंह थापाको 
रोहबर र अधिवेशन तयारी समितिका लोक गुरुङ, विज्ञान प्रसाई, चेतनाथ खनाल, विनोद मोक्तान, डा. सम्पूर्णानन्द ढुंगाना, शेरबहादुर सुनार लगायतको उपस्थितिमा केही पदाधिकारीले आज शपथ लिए । निर्वाचन समितिका संयोजक शेर सुनारले नयां कार्यसमितिका पदाधिकारीहरुको नाम घोषणा गरेका थिए । तर, विज्ञान प्रसाईं समूहले भोलिमात्र नाम दिने भएपछि पूर्ण कार्यसमितिको घोषणा भोलि नै गरिने छ ।

अधिवेशनमा केही नाममात्र घोषणा गरिएको छ । जसमा उपसभापतिमा सूर्य नेम्वाङ, तर्कजंग गुरुङ, कोपिला सुब्बा, सुभाष पोखरेल, युवराज सिंह, आलेख चौहान, महामन्त्रीमा प्रवेश केसी, कोषाध्यक्ष नर्बु शेर्पा, सह-महामन्त्रीमा रोमियन लिम्बु, रितेश पाण्डे, उपेन्द्र पौडेल, राज सिटौला आदि निर्विरोध भए ।

त्यसैगरि, सदस्यहरुमा शान्ति लिम्बु, इन्द्रहाङ लिम्बु, लालकुमार सुब्बा, सन्तोष गुरुङ, केशव गुरुङ, सन्जय पन्त, इशा ताम्राकार, विकास सापकोटा, शंकर श्रेष्ठ, भेष गुरुङ, शशी गुरुङ, इन्द्रमान गुरुङ आदि छन् ।

तस्विरः शिव भण्डारी