भारतमा संविधान संशोधनको विषय उठाइएकामा एमालेको आपत्ति

काठमाडौँ, १० भदौ । नेकपा (एमाले) स्थायी कमिटीको आजको बैठकले प्रधानमन्त्री शेरबहादुर देउवाले भारत भ्रमणका क्रममा मुलुकको संविधान संशोधनको विषय उठाइनुले नेपालको आन्तरिक मामलामा वाह्य पक्षलाई संलग्न गराउने काम भएको भन्दै आपत्ति जनाएको छ ।

सो पार्टीका काबा अध्यक्ष वामदेव गौतमको अध्यक्षतामा आज बसेको बैठकले प्रधानमन्त्री देउवाले नयाँ दिल्लीमा आयोजित संयुक्त पत्रकार सम्मेलनमा संविधान संशोधनमा सहमति जुटाउने प्रयास जारी रहेको अभिव्यक्ति दिएर संविधान निर्माण गर्ने ऐतिहासिक संविधानसभा तथा सार्वभौम व्यवस्थापिका–संसदको अपमान समेत गरेको ठहर गरेको हो ।

बैठकले भारतीय सीमामा एकतर्फी ढङ्गले बनाइएका बाँध तथा अन्य संरचनाका बिषयमा गंभीर छलफल गरी दिगो समाधान खोज्न, नेपालका कृषि तथा औद्योगिक उत्पादनहरुलाई भारतीय बजारमा सहज पहुँच सुनिश्चित गर्न, बर्षौंदेखि अधुरा रहेका परियोजनालाई यथाशीघ्र सम्पन्न गर्न एवं नेपालको राष्ट्रिय हितको पक्षमा दृढतापूर्वक उभिन हाम्रो पार्टी लगायत विभिन्न राजनीतिक दलले दिएको सुझाव र आम नेपाली जनताको भावनाको यथोचित सम्मान प्रधानमन्त्रीबाट हुन नसकेको बैठकको पनि निष्कर्ष निकालेको छ ।

पार्टीका सचिव प्रदीप ज्ञवालीले विज्ञप्ति जारी गरी यी लगायत अन्य कतिपय विवादास्पद विषयमा सार्वभौम संसदमार्फत् नेपाली जनतालाई स्पष्ट पार्न प्रधानमन्त्रीको ध्यानाकर्षण गराउने निर्णय भएको जनाइएको छ ।