निर्वाचनको थप नतिजा

ललितपुर, ४ जेठ । गोदावरी नगरपालिकाको प्रमुखमा नेपाली काँग्रेसका गजेन्द्र महर्जनले १३ हजार ८२० मत प्राप्त गरी विजयी हुनुभएको छ ।

महर्जनका प्रमुख प्रतिस्पर्धी नेकपा (एमाले)का श्यामकृष्ण सिलवालले ११ हजार ८७ मत र माओवादी केन्द्रका श्रीगोविन्द महर्जनले पाँच हजार ६६२ मत प्राप्त गर्नुभएको थियो ।

त्यसैगरी उपप्रमुखमा नेपाली काँग्रेसका मुना भण्डारी १२ हजार ७७९ मत प्राप्त गरी विजयी हुनुभएको छ । उहाँका प्रमुख प्रतिस्पर्धी एमालेका तारा सञ्जेलले १२ हजार ३९६ मत र माओवादी केन्द्रका सीता घिमिरेले छ हजार ४१३ मत प्राप्त गर्नुभएको छ ।

तीन गाउँपालिका तीन पार्टीलाई 

स्थानीय तहको निर्वाचनमा यहाँका तीनवटा गाउँपालिकामा तीन ठूला राजनीतिक दलले एक-एक गाउँपालिकामा आफ्नो वर्चस्व कायम गरेका छन् ।

तीनवटै गाउँपालिकाको मतपरिणामअनुसार वाग्मती गाउँपालिका प्रमुखमा नेपाली काँग्रेसका वीरबहादुर लोप्चन, कोञ्ज्योसोममा नेकपा (माओवादी केन्द्र)का गोपीलाल सिङ्तान र महाँकाल गाउँपालिकामा नेकपा (एमाले)का रामचन्द्र दाहाल विजयी हुनुभएको छ ।

वाग्मती गाउँपालिकाको अध्यक्षमा काँग्रेसका लोप्चनले तीन हजार ४०२ मत ल्याएर आफ्नो जित सुनिश्चित गर्नुभएको छ भने उहाँको निकटतम प्रतिद्वन्द्वी नेकपा (एमाले)का दुर्गाप्रसाद घिमिरेले दुई हजार २५२ मत प्राप्त गर्नुभएको छ ।

सोही गाउँपालिकाको उपाध्यक्षमा काँग्रेसकै रञ्जना तिमल्सिनाले तीन हजार ४२६ मत ल्याएर विजयी बन्नुभएको छ भने उहाँको निकटतम प्रतिद्वन्द्वी एमालेकी डोलकुमारी सिङ्तानले दुई हजार ३४० मत प्राप्त गर्नुभएको थियो ।

यसैगरी कोञ्ज्योसोम गाउँपालिकाको अध्यक्षमा एक हजार ७९८ मत ल्याएर माओवादीका सिङ्तान विजयी बन्नुभएको छ । उहाँको निकटतम प्रतिद्वन्द्वी काँग्रेसका राजनप्रसाद घिमिरेले एक हजार ७३२ मत ल्याउनुभएको थियो ।

सोही गाउँपालिकामा माओवादी केन्द्रकी मिङ्मा लामाले एक हजार ९३३ मत ल्याएर उपाध्यक्ष पदमा विजयी हुनुभयो भने उहाँको निकटतम प्रतिद्वन्द्वी एमालेका सुशीला दुलाल घिमिरेले एक हजार ४५७ मत प्राप्त गर्नुभएको थियो ।

यस्तै महाँकाल गाउँपालिकाको अध्यक्षमा एमालेका रामचन्द्र दाहालले दुई हजार ८० मतका साथ विजयी बन्नुभएयो, दोस्रो स्थानमा रहनुभएका काँग्रेसका भिमसेन घिमिरेले एक हजार ७२२ मत ल्याउनुभएको छ ।

सोही गाउँपालिकामा दुई हजार २६३ मत ल्याएर एमालेका कमला तामाङले उपाध्यक्षको पद सुनिश्चित गर्नुभएको छ । काँग्रेसका सुशीला अधिरकारीले सोही पदका लागि एक हजार ३९९ मत ल्याउनुभएको थियो ।

वाग्मती गाउँपालिका वडा नम्बर १, २, ३ र ४ मा क्रमशः काँग्रेसका जगत लो, विजय लो, विष्णुप्रसाद तिमल्सिना र नारायण घले वडा अध्यक्षमा निर्वाचित हुनुभएको निर्वाचन अधिकृत रोशनी श्रेष्ठले बताउनुभयो । यसैगरी वडा नम्बर ५, ६ र ७ मा क्रमशः एमालेका उम्मेदवार राजकुमार मगर, लालबहादुर बम्जन र नवराज सञ्जेल विजयी बन्नुभएको छ ।

कोञ्ज्योसोम गाउँपालिका वडा नम्बर १, ३ र ५ मा क्रमशः माओवादी केन्द्रका सन्तलाल तामाङ, ध्रुव घिमिरे र सुवीन्द्र तामाङ वडाध्यक्षमा विजयी बन्नुभएको छ भने वडा नम्बर ३ र ४ मा क्रमशः काँग्रेसका तिलक लामा र तीर्थ लामा अध्यक्षमा विजयी बन्नुभएको छ ।

यस्तै महाँकाल गाउँपालिका वडा नम्बर २, ३, ४ र ६ मा क्रमशः एमालेका सन्तमान स्याङ्तान, गङ्गारामा तिमल्सिना, शान्तप्रसाद गौतम र रामकृष्ण आचार्य वडाध्यक्षमा निर्वाचित हुनुभएको छ । काँग्रेसका खोम गौतम वडा नम्बर १ मा खोमप्रसाद दाहाल वडा नम्बर ५ बाट वडाध्यक्षमा विजयी बन्नुभएको मुख्य निर्वाचन अधिकृत बालमुकुन्द दवाडीले बताउनुभयो ।

पूरै छ स्थानीय तहमा माओवादी केन्द्र विजयी

रुकुम, ४ जेठ । गत वैशाख ३१ गते भएको पहिलो चरणको स्थानीय तहको निर्वाचनमा यहाँका छ वटै स्थानीय तहमा नेकपा (माओवादी केन्द्र) ले जितेको छ ।

मुसीकोट, चौरजहारी र आठबिसकोट नगरपालिका प्रमुख तथा उपप्रमुख र बाँफीकोट, सानीभेरी र त्रिवेणी गाउँपालिका अध्यक्ष र उपाध्यक्षमा माओवादी केन्द्रका उम्मेदवार विजयी बनेका हुन् ।

मुसिकोट नगरपालिका प्रमुखमा माओवादी केन्द्रका देवीलाल गौतम चार हजार ३५० मतले विजयी हुनुभयो भने प्राप्त गर्नुभयो उहाँका निकटतम प्रतिद्वन्द्वी नेपाली काँग्रेसका महेन्द्र केसीले चार हजार १७४ मत प्राप्त गर्नुभएको छ । उपप्रमुखमा पनि माओवादी केन्द्रकै प्रेमकुमारी सुनार चार हजार ४७९ मत ल्याई विजयी हुनुभएको छ । उहाँका निकटतम प्रतिद्वन्द्वीमा बालकुमारी गिरीले चार हजार १५८ मत प्राप्त गर्नुभयो ।

आठबिसकोट नगरपालिका प्रमुख तथा उपप्रमुख दुवै पदमा माओवादी केन्द्रले जितेको छ । माओवादी केन्द्रका तर्फबाट प्रमुखका उम्मेदवार गोर्खबहादुर केसीले काँग्रेसका धीरेन्द्र बटाला र माओवादी केन्द्रकै उपप्रमुखकी उम्मेदवार गीता नेपालीले काँग्रेसकी अनिता बुढालाई पराजित गर्नुभएको हो ।

यस्तै चौरहजारी नगरपालिका प्रमुख र उपप्रमुखमा माओवादी केन्द्रका क्रमशः विशाल शर्मा र राधा रोका विजयी बन्नुभएको छ । दुवै जनाले नेपाली काँग्रेसका उम्मेदवारलाई पराजित गर्नुभएको हो ।

यसैगरी त्रिवेणी गाउँपालिका अध्यक्ष र उपाध्यक्षमा माओवादी केन्द्रका झक्कुप्रसाद घर्ती र निर्मला विष्ट विजयी हुनुभएको छ । दुवैले काँग्रेसका उम्मेदवारलाई पराजित गर्नुभएको हो । सानीभेरी गाउँपालिकामा माओवादी केन्द्रका नरबहादुर पुन विजयी काँग्रेसका गोरखप्रसाद चन्दलाई पराजित गरी विजयी हुनुभएको हो ।

बाँफिकोट गाउँपालिका अध्यक्ष र उपाध्यक्षमा माओवादी केन्द्रका धर्मबहादुर केसी र मनकला पुन विजयी बन्नुभएको हो । उहाँहरु दुवैले काँग्रेसका उम्मेदवारलाई पराजित गर्नुभएको थियो । निर्वाचन भएका यहाँका ७३ वडामध्ये ५८ वडामा जित हात पारेको छ । यहाँ काँग्रेसले १३ र एमालेले दुई वडामा जितेका छन् ।