अब निर्वाचन कसैले रोक्न सक्दैन– ओली

पोखरा, १८ चैत । नेकपा (एमाले)का अध्यक्ष केपी शर्मा ओलीले आगामी वैशाख ३१ गते हुने स्थानीय तहको निर्वाचनको उत्साह जनतामा जागिसकेकाले अब निर्वाचन कसैले चाहँदैमा रोक्न नसक्ने बताउनुभएको छ ।

एमाले कास्कीले आज पोखराको चिप्लेढुङ्गामा आयोजना गरेको जनसभालाई सम्बोधन अध्यक्ष ओलीले झन्डै १९ वर्षपछि हुन लागेको निर्वाचनले स्थानीय तहलाई अधिकारसम्पन्न बनाउने भएकाले कसैको भ्रममा नपरी निर्वाचनमा भाग लिन असन्तुष्ट पक्षसँग आग्रह गर्नुभयो । उहाँले अब देशलाई आर्थिक समृद्धिको बाटोमा लैजान सरकार र सवै राजनीतिक दलहरूले सोच्नुपर्ने बेला आएको धारणा राख्नुभयो ।

एक वर्षअघि आफूले शिलान्यास गरेको पोखरा अन्तर्राष्ट्रिय विमानस्थलको काममा ढिलाइ भइरहेकामा चिन्ता व्यक्त गर्दै पूर्वप्रधानमन्त्री ओलीले यसको निर्माणमा तीव्रता दिन सम्बन्धित निकायसँग आग्रह गर्नुभयो । उहाँले केरुङ–काठमाडौँ–पोखरा रेलमार्ग निर्माण, सबै राजमार्गलाई चार लेनको बनाउन र फेवा, रुपा, बेगनासलगायत सवै तालको संरक्षणमा आफूले विशेष पहल गर्ने आश्वासन दिनुभयो ।

नेता ओलीले केही राजनीतिक दलले आपराधिक गतिविधि सञ्चालन गरी एमालेका कार्यकर्ताका घरमा तोडफोड तथा आगजनी गर्ने र कार्यकर्तामाथि आक्रमण गर्ने काम गरेकाले त्यस्ता काम नगर्न चेतावनीसमेत दिनुभयो ।

सो अवसरमा अध्यक्ष ओलीले विभिन्न दल परित्याग गर्ने करिब एक हजार तीन सय जनालाई टीका लगाई पार्टी प्रवेश गराउनुभएको थियो । यसअघि पोखराका बगर, रानीपौवा र सिर्जनाचोकमा एकत्रित जुलुस चिप्लेढुङ्गामा पुगेर जनसभामा परिणत भएको थियो ।