एभरेष्ट इनमा बेलायतीमाझ दीपावली कार्यक्रम

लन्डन । लन्डन दूतावासले बेलायतीलाई नेपाल घुम्न जान अनुरोध गरेको छ । एभरेष्ट इन ग्रुपले दीपावलीका अवसरमा बेलायतीमाझ आयोजना गरेको एक कार्यक्रममा लन्डन दूतावासका उपनियोग प्रमुख शरदराज आरणले नेपालको प्राकृतिक सौन्दर्यताको वर्णन गर्दै एकपटक नेपाल जान अनुरोध गरे । नेपाल घुमिदिए भूकम्पपछि तंग्रिरहेको नेपालको पर्यटन क्षेत्रमा थप सहयोग पुग्ने उनको आशा थियो । 
आरणले यही नोभेम्बर ८ (मंगलबार) सांझ दूतावासमा पर्यटन प्रवर्धन कार्यक्रम गर्न लागिएको समेत जानकारी दिए । वेष्ट भ्यालू डेस्टिनेसन नेपाल नाम दिइएको उक्त कार्यक्रममा विदेशी पर्यटक, लेखक, आरोही 
लगायतलाई निम्त्याइएको छ ।

कार्यक्रममा नेपाल पर्यटन बोर्डका बेलायत प्रतिनिधि पशुपति भण्डारीले पनि नेपाल एक पटक भ्रमण गर्नैपर्ने देश भएको बताए । उनले 
भूकम्पपछि पनि नेपाल घुम्न सुरक्षित रहेको उल्लेख गरे ।

ग्रुपका निर्देशक यादव भण्डारीले नेपालको पर्यटन प्रवर्धनसंगै नेपाली कुजिन, न्यानो आतिथ्य र संस्कृतिमार्फत बेलायतीलाई नेपालतर्फ आकर्षित गर्ने कार्यक्रमको मुख्य उद्देश्य रहेको प्रष्ट्याए । कार्यक्रममा आसफोर्ड केन्ट मेयर, गोर्खा मेजर बुद्धिबहादुर भण्डारी, प्रजातान्त्रिक विचार समाजका अध्यक्ष डा. केदारनरसिंह केसी, नेपाल घुमेका पर्यटक, टाभल व्यवसायी लगायत 
सहभागी थिए ।

कार्यक्रममा नेपालको पर्यटन सम्वन्धि एउटा वृत्तचित्र समेत प्रदर्शन गरियो । उक्त अवसरमा एभरेष्ट इन ग्रुपले विदेशी पाहुनालाई टिका, खादाले सम्मान गर्दै दीपावलीको महत्व दर्शाएको थियो । कार्यक्रममा स्थानीय मोडल सुस्मिता थापाले तिहार गीतमा आकर्षण नृत्य गरिन् भने सहभागी विदेशी पाहुनाले समेत सुस्मितालाई नाचगानमा साथ दिएका थिए ।