एनजेले दिए मोस्ट नकल पुस अपमा विश्वलाई चुनौती

लन्डन । ग्रयाण्ड मास्टर डा. एनजे गुरुङले मोस्ट नकल पुस अप वान मिनेट गिनिज वर्ल्ड रेकर्डका लागि २ अक्टोबर, ०१६ आइतबार विश्वलाई चुनौती दिएका छन् ।

नर्थहोल्ट पार्क सोसियल क्लव, लन्डनमा उनले एक मिनेटमा ९४ पटक पुस अप गरेर हाल कायम रहेको विश्व रेकर्ड तोड्न चुनौती दिएका हुन् ।

हालसम्म क्यानेडियन नागरिकले एक मिनेटमा ८४ पटक पुस अप गरेका छन् । तेक्वान्दोका आठौं डान गुरुङले बेलायती क्वालिफाइड अफिसियल, निर्णायक, नेपाली संघसंस्थाका प्रतिनिधि, विभिन्न व्यवसायिक व्यक्तित्व र पत्रकारहरुको माझमा नयां कीर्तिमानको दावेदारी प्रस्तुत गरे ।

करिब १० देखि १२ हप्ताभित्र गिनिज वर्ल्ड रेकर्डले आफूलाई विश्वकै पहिलो रेकर्ड होल्डरका रुपमा नाम घोषणा गर्न सक्ने गुरुङले बताए ।

एनआरएनए आइसीसी युरोप स्पोर्टस टाक्स फोर्सका संयोजक गुरुङ एनजे तेक्वान्दो एकेडेमी यूकेका संस्थापक समेत हुन् । उनी नोआ आर्क स्पोर्ट साइन्स युनिभर्सिटी बिल्डिङ द गडस किङगडम मिसन नामक च्यारिटी संस्था दर्ता गरेर खेलकुद विकासमा खटिएका छन् । भविष्यमा तेक्वान्दोबाट नेपाललाई ओलम्पिकमा सहभागिता गराउने उनको अठोट छ । एन्टा यूके अध्यक्ष समेत रहेका गुरुङले सन् २०१२ र २०१६ को ओलम्पिकका लागि संस्थामार्फत आर्थिक सहयोग गरेका थिए ।

तस्विरः ओमकार गुरुङ

भिडियो हेर्नुहोस्