नेपाली दूतावासमा मनाइयो राष्ट्रिय दिवस

लन्डन । लन्डनस्थित नेपाली दूतावासले २० सेप्टेम्बर अपरान्ह विदेशी कुटनीतिज्ञमाझ नेपालको राष्ट्रिय दिवस मनाएको छ । नेपालमा नयां संविधान जारी गरिएको दिनलाई नेपाल सरकारले राष्ट्रिय दिवस (नेशनल डे) मनाउने निर्णय गरे बमोजिम दूतावासले कार्यक्रम गरेको हो ।

कार्यक्रमलाई सम्वोधन गर्दै कार्यवहाक राजदूत शरदराज आरनले नेपाल र बेलायतको सम्वन्ध झन् मजवुत बन्दै गएको बताए । उनले बेलायत नेपालबीच लामो ऐतिहासिक सम्वन्ध रहेको बताउंदै यस वर्ष दुई देशबीच कुटनीतिक सम्वन्ध स्थापनाको दुई सय वर्ष मनाइएको अवगत गराए ।

आरनले गत मार्च तेश्रो साता राजकुमार ह्यारी नेपाल भ्रमणमा गएको स्मरण गर्दै यसले बेलायती नागरिकमाझ नेपालबारे थप जानकारी र सदभावना वृद्धि भएको पनि उल्लेख गरे । कार्यवहाक राजदूत आरनले नेपालले गत वर्षको भूकम्पपछि बेलायतबाट ठूलो सहायता पाएको जनाउंदै कृतज्ञता समेत व्यक्त गरे ।

उनले हाल ब्रिगेड अफ गोर्खाजमा करिब २६ सय नेपालीले सेवा गरिरहेको जनाउंदै ब्रिगेड अफ गोर्खाज सन् १९४७ देखि ब्रिटिश आर्मीको परिपूरक रहेको पनि बताए । आरनले ग्रेट ब्रिटेन र नर्दन आयरल्याण्ड नेपालको व्यापार, लगानी र विकासका महत्वपूर्ण साझेदार रहेका बताउंदै बेलायती सहायताले नेपालको सामाजिक आर्थिक अवस्था सुदृढ भइरहेको उल्लेख गरे । 
उनले नेपाल सर्वोच्च शिखर सगरमाथा र बुद्धको देश, भगवान शिवको घर पशुपतिनाथ साथै सांस्कृतिक धरोहर, प्राकृतिक सौन्दर्य र जैविक विविधताले भरिएको देश भएको पनि बताए ।

कार्यक्रममा विशेष अतिथी बेलायती विदेश मन्त्रालयकी दक्षिण एसिया प्रमुख लाउरा क्लार्कले बेलायत सरकारको प्रतिनिधित्व गर्दै नेपालको राष्ट्रिय दिवस मनाउन पाएकामा खुशी व्यक्त गरिन् । उनले दुई शताब्दीदेखि बेलायत नेपाल सम्वन्ध ज्यादै बलियो रहेको उल्लेख गर्दै बेलायतमा नेपाली जनसंख्या ८० हजार बढि रहेको र प्रत्येक वर्ष करिब ३० हजार बेलायती नेपाल भ्रमणमा जानुले पनि आपसी सम्वन्ध प्रगाढ रहेको पुष्टि गरेको उल्लेख गरिन् ।

बेलायतले भूकम्पपछि तत्काल राहत र पुनर्निर्माणमा उल्लेख्य आर्थिक सहयोग गरेको जनाउंदै क्लार्कले भर्खर मात्र चिभिनिङ छात्रवृत्तिमा नेपालबाट १३ जना विद्यार्थी विश्वकै प्रतिष्ठित विश्वविद्यालयमा पढ्न बेलायत आएका जनाइन् ।
उनले नेपालले संयुक्त राष्ट्रसंघको शान्ति स्थापक सेनामा विश्वकै छैठौं ठूलो संख्यामा सेना पठाएर सहयोग गरिरहेको प्रसंग पनि उठाइन् । दुई देशबीचको सम्वृद्धिका लागि बेलायत र नेपालले भविष्यमा संगै काम 
गर्ने पनि क्लार्कले जनाइन् ।

अट्याची तेजेन्द्र रेग्मीले सञ्चालन गरेको उक्त कार्यक्रममा नेपालीसहित विदेशी कुटनीतिज्ञहरु, बेलायती विदेश मन्त्रालय, गृह मन्त्रालय लगायतका विशिष्ठ पदाधिकारी सहभागी थिए ।

सहभागी पाहुना एभरेष्ट इनको स्वादिष्ट नेपाली खानामा रमाए ।

तस्विरः बीरेन्द्र श्रेष्ठ