लन्डन मेलामा नेपाली दूतावासको सहभागिता हुने

लन्डन । भोलि शनिबार (३ सेप्टेम्बर) वेम्ली पार्कमा हुन लागेको १४ औं लन्डन मेलामा लन्डनस्थित नेपाली दूतावास र नेपाल पर्यटन बोर्डको समेत सहभागिता हुने भएको छ । नेपाली कला संस्कृति एवं पर्यटन प्रवर्धन गर्ने उद्देश्यले दूतावास र बोर्डको सहभागिता हुन लागेको कार्यवहाक राजदूत शरदराज आरनले जानकारी दिए । दूतावासले बेग्लै स्टल राखेर त्यहांबाट नेपाल पर्यटन प्रवर्धनात्मक सामाग्री वितरण गरिने पनि अरनले बताए । यसका लागि नेपाल पर्यटन बोर्डका बेलायत प्रतिनिधि पशुपति भण्डारीले सहकार्य गरिरहेका छन् । मेलामा नेपाली गीत संगीत र नाच गरि तीनवटा प्रस्तुति समेत हुनेछ । दूतावासले मेलामा सहभागी भएर आफ्नो अभियानमा साथ दिन सबैमा आग्रह गरेको छ ।

सन् २०१० देखि नै दूतावास लन्डन मेलामा प्रत्यक्ष सहभागी हुंदै आएको छ । मेलामा विगत जस्तै यसपटक पनि प्रथम नौमति बाजा गुल्मी यूकेले आफ्नो प्रस्तुति दिने कार्यक्रम छ । दिउसो ब्रेन्ट मेयर काउन्सिलर परवेज अहमेदले ब्रेन्ट सिभिक सेन्टरमा दिन लागेको रिसेप्सनमा कार्यवहाक राजदूतसहित नेपाली समुदायका विशिष्ठ व्यक्तित्वलाई निम्त्याइएको छ । सो अवसरमा लन्डन मेयर सादिक खानले समेत मन्तव्य दिने कार्यक्रम छ ।

विगतमा गनर्सबरी पार्कमा हुंदै आएको जि लन्डन मेला यसपटक वेम्ली पार्कमा हुने लागेको हो । १२ देखि सांझ ७ बजेसम्म हुने उक्त मेलामा प्रवेश निशुल्क गरिएको छ र यसमा करिब ४० हजार दर्शक सहभागी हुने अपेक्षा छ । दक्षिण एसियाली संस्कृति झल्काउने उक्त मेलामा गीत संगीत, खाना र कलाको समेत समिश्रण रहनेछ ।