काँग्रेसमा सरकारमा सहभागी हुने मन्त्रीको नामावली पठाउने विषयमा विवाद

वरिष्ठ नेता रामचन्द्र पौडेल

वरिष्ठ नेता रामचन्द्र पौडेल

काठमाडौँ, ८ भदौ । सत्ता साझेदार दल नेपाली काँग्रेसमा सरकारमा सहभागी हुने मन्त्रीको नामावली पठाउने विषयमा विवाद चुलिएको छ ।

काँग्रेसले प्रधानमन्त्री पुष्पकमल दाहाल नेतृत्वको सरकारमा सहभागी हुन बाँकी मन्त्रीको नाम आज टुङ्गो लगाउने भने पनि हालसम्म त्यसमा सहमति हुन सकेको छैन ।

पार्टीमा सभापति शेरबहादुर देउवा पक्षले मन्त्रीको नाम टुङ्गो लगाए पनि वरिष्ठ नेता रामचन्द्र पौडेल पक्षले भने नाम पठाएको छैन । मन्त्रीको नामावली टुङ्गो लगाउनेबारेमा छलफल गर्न आज नेता पौडेल निवास बोहराटारमा सो पक्षका केन्द्रीय सदस्य र सांसदको भेला भएको थियो ।

भेलाले सभापति देउवाले मन्त्रीको नाम टुङ्गो लगाउने कार्यमा पार्टीको विधि, परम्परा र पद्धति पालना नगरेको आरोप लगाउँदै तत्काल सरकारमा सहभागिताको काम अघि नबढाउने निर्णय गरेको केन्द्रीय सदस्य गुरुराज घिमिरेले जानकारी दिनुभयो ।

काँग्रेसले वर्तमान सरकारमा १३ मन्त्रालय पाउने नेकपा (माओवादी केन्द्र) सँग सहमति भएको थियो । नेता पौडेल पक्षले पाँच मन्त्रालयको दाबी गरे पनि सभापति देउवा पक्ष भने त्यसमा सहमत नभएको बताइएको छ । नेता पौडेल पक्षले सरकारमा सहभागिताका लागि सम्मानजनक अवस्था नभए सरकारमा नजाने निर्णय गरेको उहाँले बताउनुभयो ।

भ्रातृ सङ्गठन नेपाल विद्यार्थी सङ्घको महाधिवेशनका कारण काँग्रेसले मन्त्रीको नाम पठाउन ढिलाइ गरेको थियो । काँग्रेसले यसअघि उपप्रधान एवम् गृहमन्त्रीमा विमलेन्द्र निधि र भौतिक पूर्वाधार तथा यातायात व्यवस्थामन्त्रीमा रमेश लेखकलाई पठाइसकेको छ ।

यद्यपि नेता पौडेल पक्षको भेलामा सहभागी नेता बलबहादुर केसीले भने सभापतिलाई पार्टीको विधिविधान र परम्परा कार्यान्वयन गर्न आग्रह गर्नेबारेमा छलफल भएको बताउनुभयो । “अहिलेको अवस्थामा सबैलाई मिलाएर लैजाने जिम्मेवारी सभापति देउवाको हो”– उहाँले भन्नुभयो ।

काँग्रेस सभापति शेरबहादुर देउवा शुक्रबार उपचारका लागि सिङ्गापुर जाने कार्यक्रम भएकाले त्यसअघि नै काँग्रेसबाट सहभागी हुने सबै मन्त्रीलाई शपथ गराउने तय भएको थियो । माओवादी केन्द्रले भने आफूले पाउने सबै आठ मन्त्रालयमा मन्त्री पठाइसकेको छ ।

प्रतिक्रिया

सम्बन्धित सामाग्री