शनिबार, कार्तिक १५ २०७७ | Sat, October 31, 2020
नेपालको समय: ०१:२९ | UK Time: 19:44

फिलिपिन्स सरकार र विद्रोहीबीच शान्ति वार्ता हँुदै

वीनेपाली
२०७३ भदौ ६ गते १२:२०

Flag_of_the_Philippines.svg

मनिला, ६ भदौ । फिलिपिन्सको कम्युनिष्ट विद्रोही समूह, मोरो स्लामिक लिबरेशन फ्रन्ट र यहाँको सरकारबीच शान्ति वार्ता सुरु हुने तयारी भएको बताइएको छ ।

सरकार र विद्रोहीका तर्फबाट यसअघि नै युद्धविराम भइसकेको छ । वार्ताका लागि दुबै तर्फबाट प्रतिबद्धता सार्वजनिक भएको छ ।

सरकार र विद्रोही समूहबीच शान्ति वार्ता सोमबारबाटै सुरु हुने कार्यक्रम रहेको छ । सरकारी र विद्रोही पक्षका वार्ता टोलीका सदस्यहरु वार्ताका लागि ओश्लो पुगिसकेका छन् ।

यसअघि दिइएको जानकारी अनुसार सरकारी वार्ता टोली र विद्रोहीपक्षबीचको वार्ता अगष्ट २२ देखि २६ सम्म नर्वेको राजधानी ओश्लोमा हुने सार्वजनिक गरिएको थियो ।

यस वार्ताका लागि गतहप्तामात्र जेलमुक्त भएका फिलिपिन्सको विद्रोही कम्युनिष्ट पार्टीका वरिष्ठ दुई जना नेता पनि ओश्लो पुगेको खबर छ । उनीहरुलाई गतहप्ता नै सरकारी जेलबाट मुक्त गरिएको थियो ।

उक्त समूहबीच यसअघि भएको शान्ति सम्झौताको कार्यान्वयनका लागि हालै एक सम्झौता भएको थियो । करिब आठदिन अघि नै सो सम्झौता लागू भएको बताइएको छ ।

फिलिपिन्सका राष्ट्रपति रोड्रिगो डुटेर्तेले शनिबार साँझ सरकारका तर्फबाट युद्धविरामको घोषणा गर्नुभएको थियो । त्यसपछि शान्ति वार्ताको सफलताका लागि आह्वान पनि उहाँले गर्नुभएको जनाइएको छ ।

मलेसियाको सहयोग र समन्वयमा सन् २०१४ मा उक्त विद्रोही समूह र सरकारबीच शान्ति वार्ता भएको थियो तर त्यसले सफलता भने प्राप्त गर्न सकेको थिएन ।

यस पटकको शान्तिवार्ताबाट निकास निस्किनेमा सबैजना आश्वस्त रहेको मनिलाबाट प्राप्त समाचारमा जनाइएको छ ।

 

प्रतिक्रिया

सम्बन्धित सामाग्री

फेसबुक