कर्णेल लामाको मुद्दा निष्कर्षतिर

लन्डन । कर्णेल कुमार लामाको मुद्दा निष्कर्षतिर पुगेको छ । लामा विरुद्धको मुद्दा छिनोफानो गर्न १२ सदस्यीय जुरी हिजो मंगलबार र आज पनि व्यस्त छ ।

लन्डनस्थित सेन्ट्रल क्रिमिनल कोर्ट (फौज्दारी अदालत) ओल्ड बेलीमा करिब सात हप्ताको सुनुवाइ सकिएपछि मंगलबार देखि अन्तिम टुंगो लगाउन छलफल भइरहेको हो ।

जस्टीस स्वीनी नेतृत्वको इजलासमा वादी तथा प्रतिवादीका तर्फबाट वहस सकिइसकेको छ । अब छिट्टै समर छुट्टी हुने भएकाले एक दुई दिनभित्रै फैसला आउने आशा गरिएको छ ।

श्रोतका अनुसार १२ सदस्यीय जुरीबीच सर्वसम्मत भएमात्र अन्तिम फैसला हुने नत्र पुनः सुनुवाइमा जानुपर्ने कानुनी प्रावधान छ ।

लामामाथि बेलायती क्रिमिनल जस्टिस एक्ट १९८८, १३४ (१) अन्तर्गत मुद्दा छ । दक्षिण सुडानस्थित संयुक्त राष्ट्रसंघको शान्तिस्थापक सेनामा खटिएका बेला छुट्टीमा परिवार भेटन बेलायत आउंदा सन् २०१३, जनवरी ३ मा लामालाई लन्डन मेट्रोपोलिटन प्रहरीले विश्वव्यापी क्षेत्राधिकार अन्तर्गत पक्राउ गरेको थियो । प्रहरीले लामाले ११ वर्षअघि कपिलवस्तु जिल्लाको गोरुसिंगेस्थित एक सैनिक व्यारेकमा थुनामा रहेका जनकबहादुर राउत र करम हुसेनलाई यातना दिएको अभियोग लगाएको थियो ।

लामाको मुद्दा गत वर्ष भने अभियोजन पक्षले दोभाषे नभेट्टाएपछि सुनुवाइ स्थगित भएको थियो ।

लामाको मुद्दामा नेपाल सरकारले पनि प्रत्यक्ष चासो राख्दै आएको छ । लामाको रिहाइका लागि नेपाल सरकारले पटक पटक कुटनीतिक तथा कानुनी पहल गरेपनि बेलायतले आफ्नो स्वतन्त्र न्यायप्रणालीमा हस्तक्षेप गर्न नसकिने भन्दै वास्ता गरेको थिएन । इकान्तिपुर