टर्कीमा कु प्रयास विफल, ९० मारिए

अंकारा, १ साउन । टर्कीमा सत्ता हत्याउने प्रयास विफल भएको राष्ट्रपति एर्डोगान तेयिपले बताएका छन् । कु प्रयासमा हालसम्म ९० जना मारिएको समाचार छ । ११५४ घाइते भएका जनाइएको छ ।

दुई ठूला शहर इस्तानबुल र अंकारामा गएराति भएको गोलाबारी र विस्फोटका घट्नाका जिम्मेवार विद्रोही सेनाका १५७३ भन्दा बढीलाई सरकार समर्थित सेनाले गिरफ्तार गरेको छ । पक्राउ पर्नेमा २९ जना जर्नेल, पांच जना जनरल सहित छन् ।

टर्कीको टेलिभिजनले इस्तानबुलस्थित बोसफोरस नदीको पुलमा बख्तरबन्द गाडीहरुबाट दर्जनौं सेनाले आत्मसमर्पण गरेको देखाएका छन् । तथापि, राजधानी अंकाराका ठाउंठाउंमा विस्फोट र गोली चलेको आवाज आइरहेको छ ।

राष्ट्रपति एर्डोगानले टर्कीको सत्ता लिएको १३ वर्ष पुग्नै लागेको छ, र यसबीचमा उनको सत्ताविरुद्ध आवाज उठ्न थालेको छ । हाल छुट्टीमा रहेका राष्ट्रपति एर्डोगान रातारात इस्तानबुल फर्किएका थिए, र उनी फर्कदा टर्कीका सडकमा हजारौं समर्थकले उनलाई स्वागत गरेका थिए ।

यद्यपि राष्ट्रपतिको विरोधमा समेत सहरका विभिन्न स्थानमा प्रदर्शन भइरहेका छन् ।

“यो राष्ट्रद्रोह हो । यो विद्रोहको कार्यमा संलग्नले महंगो मूल्य चुकाउनु पर्नेछ, राष्ट्रपति एर्डोगानले विमानस्थलमा बताए ।

सरकारले परिस्थितिलाई नियन्त्रणमा लिने उद्देश्यले दुवै सहरका विभिन्न स्थानमा कफ्र्यू लगाएको घोषणा गरेको छ ।