जन्मियो हिमालयन मनोरन्जन समूह

लन्डन । बेलायतको स्वीन्डन आधार क्षेत्र बनाएर एउटा नयां संस्था हिमालयन मनोरन्जन समूह स्थापना भएको छ । नेपाली कला, संस्कृति जगेर्ना साथै प्रवर्धन गर्ने उद्देश्यसहित खोलिएको उक्त संस्थामा ज्ञान गुरुङ, यम प्रसाद गुरुङ, भुवन गुरुङ, मिलन गुरुङ, खगेन्द्र कुमार गौचन र राजन कुमार क्षेत्री गरि ६ जनाको संलग्नता छ ।

उक्त समूहले नेपालमा विभिन्न विद्यामा समर्पित कलाकारहरु बेलायत झिकाइ कार्यक्रम गरेर त्यसबाट बचेको रकम नेपालमा सामाजिक क्षेत्रमा लगाउने सोच राखेको क्षेत्रीले बताए ।

हिमालय मनोरन्जन समूहको पहिलो कार्यक्रम यही जुलाई २४ तारिखमा हुंदैछ । उक्त कार्यक्रममा स्थापित कलाकारहरु सन्दिप क्षेत्री (हांस्यब्यङय), धर्मेन्द्र सेवान (आधुनिक तथा पप गायक), श्रेया सोताङ (आधुनिक गायिका) रिश्मा गुरुङ (नायिका तथा नृत्यांगना) बेलायत आउने तय भएको छ । ति कलाकारहरुको पहिलो कार्यक्रम स्वीन्डनस्थित वाइभन थिएटरमा जुलाइ २४ तारिख आइतबार हुनेछ भने २९ तारिख उलवीच लन्डन, ३० तारिख रेडिङ र ३१ तारिखमा अल्डरसटस्थित द किङ्स सेन्टरमा हुने भएको छ ।