गतसालकाे भुकम्पकाे फाइल फाेटाे
काठमाडौँ, ३० वैशाख । गोरखा भूकम्पले अति प्रभावित १४ जिल्लामध्ये १० जिल्लाको लगत सङ्कलन सम्पन्न भएको केन्द्रीय तथ्याङ्क विभागले जनाएको छ ।
पुस तेस्रो सातादेखि विभागले अतिप्रभावित सिन्धुपाल्चोक, रसुवा, नुवाकोट, धादिङ, गोरखा, सिन्धुली, दोलखा, काभ्रेपलाञ्चोक, मकवानपुर, ओखलढुङ्गा र रामेछापमा लगत सङ्कलन सुरु गरेको थियो ।
सङ्कलन सुरु गरिएकामध्ये १० जिल्लाको सकिएको र मकवानपुरका मनोहरि एवम् फापरबारी गाविसमा अन्तिम चरणमा पुगेको विभागका निर्देशक ढुण्डीराज लामिछानेले राससलाई जानकारी दिनुभयो ।
“सङ्कलन सकिएका १० जिल्लाको लगत हेर्दा भूकम्पलगत्तै गृह मन्त्रालयमा आएको तथ्याङ्कभन्दा कम देखिएको छ, त्यसबेला र अहिलेको सङ्कलन प्रविधि फरक भएकाले यो भएको हुनसक्छ, अहिलेको तथ्याङ्क अन्तर्राष्ट्रिय सिद्धान्तअनुरुप सङ्कलन गरिएको छ”– उहाँले भन्नुभयो ।
सङ्कलन गरिएको तथ्याङ्क राष्ट्रिय पुनःनिर्माण प्राधिकरणमा पठाइएको र घर निर्माणका लागि रु दुई लाख पाउने पीडितको अन्तिम सूची प्रकाशन पनि प्राधिकरणले नै गर्ने विभागले जनाएको छ ।
उपत्यकाका तीन जिल्ला काठमाडौँ, ललितपुर भक्तपुरमा पनि लगत सङ्कलन गर्ने तयारी अन्तिम चरणमा पुगेको छ । असार पहिलो साता सुरु गर्ने गरी काम भएको निर्देशक लामिछानेले बताउनुभयो । रासस
