प्रचण्डको नेतृत्वमा नयां सरकार ?

मिडिया नेपाल मकवानपुरले आज हेटौँडामा आयोजना गरेको पत्रकारसम्मेलनमा बोल्दै अध्यक्ष थापाले भन्नुभयो, ‘‘सरकार परिवर्तन गर्दा राष्ट्रियता कमजोर हुने, राजनीतिक अस्थिरता बढ्दै जाने तथा संविधान कार्यान्वयन कठिन र जटिल हुँदै जाने भएकाले यसमा पुनः विचार गर्न आग्रह गर्दछु ।’’

अध्यक्ष थापाले वैशाख १२ गतेको भूकम्प, असोज ३ गतेको संविधान जारीपछि मधेस आन्दोलन, भारतद्वारा अघोषित नाकाबन्दीजस्ता विषम परिस्थितिमा पुनःनिर्माण गर्नुपर्ने दायित्वका बीच राष्ट्रियताको जगमा अडेको वर्तमान सरकारले आर्थिक विकास र पुनःनिर्माणको काम अघि बढाउने अवस्थामा प्रचण्डले आफ्नो दल सहभागी भएको सरकारले ठोस काम गर्न नसकेको र सरकारको विकल्प खोज्नुपर्ने वक्तव्य निकाल्नु अप्रत्याशित र अनपेक्षित रहेको बताउनुभयो ।

उहाँले एक प्रश्नको उत्तरमा वर्तमान सरकार गठन गर्नुअघि जुन बहिरी शक्तिको चलखेलले अवरोध पुरयाएको थियो, त्यही शक्तिले हाल पुनः चलखेल गरेको आरोप लगाउनुभयो ।

उता, राप्रपा नेपालले अन्तिम समयसम्म वर्तमान सरकारको प्रतिरक्षामा खडा रहने निर्णय गरेको छ । पार्टी प्रवक्ता राजाराम श्रेष्ठद्वारा आज जारी विज्ञप्तिमा ‘संविधान कार्यान्वयनको चरणमा रहेको र मुलुक राजनीतिक स्थिरता हुँदै आर्थिक समृद्धिको दिशामा अगाडि बढिरहेको सन्दर्भमा सुरु भएको सत्ता परिवर्तनको खेल उपयुक्त हैन’ भनिएको छ ।

राष्ट्रिय प्रजातन्त्र पार्टीका वरिष्ठ नेता पशुपतिशम्शेर राणाले वर्तमान सरकारको कार्यशैलीप्रति असन्तुष्टि व्यक्त गर्नुभएको छ ।
रिपोर्टर्स क्लबद्वारा यहाँ आज आयोजित साक्षात्कारमा उहाँले नाकाबन्दीपछि कालोबजारी र महँगी नियन्त्रण गर्नुको सट्टा सरकारले अहिलेसम्म पनि पेट्रोलियम पदार्थ र ग्यासजस्ता जनताको दैनिक उपभोग्य वस्तुको सहज आपूर्ति गर्न सकिरहेको छैन भन्नुभयो ।

पत्रकारहरूको एक प्रश्नमा उहाँले भन्नुभयो,–‘अब बन्ने नयाँ सरकारमा एमाओवादी अध्यक्ष प्रचण्ड वा कसलाई सघाउने भन्नेबारे पार्टीको बैठकले निर्णय गर्नेछ, तर सहमतिको राष्ट्रिय सरकार अबको आवश्यकता हो ।’

करिब पाँच महिनाको नाकाबन्दी खुलेको लामो समय हुँदासमेत सरकारले वार्ता र सहमतिको आधारमा मधेसी दलको समस्या समाधान गर्न नसकेको उहाँको भनाइ छ ।

‘भूकम्प गएको वर्ष दिन भयो, अहिले पनि जनता पालमुनि नै छन्, बर्खा सुरू भयो, सरकारले पुनःनिर्माणको कार्यलाई अझै पनि अगाडि बढाउन सकेको छैन’–उहाँले भन्नुभयो ।

वरिष्ठ नेता राणाले आफ्नो पार्टी अब वर्तमान सरकारमा रहने वा नरहनेबारे तत्काल पार्टीको कार्यसम्पादन बैठक बसेर टुङ्गो लगाउने बताउनुभयो । रासस