लन्डन । आफ्नो पछिल्लो चलचित्र बीर बिक्रम प्रिमियरका लागि बेलायत आएका बेला नायक दयाहाङ राई र निर्देशक मिलन चाम्स् ले नव गायक नवराज घलेको नयां गीतको म्यूजिक भिडियो संयुक्त रुपमा सार्वजनिक गरेका छन् । घलेको पहिलो एल्बममा रहेको गीत “आज आइ भन्छ्यौ छोडिदेऊ, यो मन कतै अन्तै मोडिदेऊ” को म्यूजिक भिडियो सार्वजनिक गरिएको हो, जसको निर्देशन कुशल श्रेष्ठले गरेका छन् । हरेक भिडियोमा केही ने केही फरकपन दिन चाहने स्थापित सञ्चारकर्मी श्रेष्ठको निर्देशन, छायांकन र सम्पादन अनि सहायक निर्देशनमा कृष्ण सुवेदीको साथले भिडियो पृथक बनेको दर्शक प्रतिक्रिया छ ।
र्याप र मेलोडी मिश्रित गीतको भिडियो छायांकन गर्न लोकेशन रोजिएको थियो लन्डनस्थित वाटरलु ग्राफिटी । त्यो भेन्यू नै यस्तो रफ देखिन्छ जहां टनेलभित्र जताजतै पेन्टिङ छ । त्यस्तो ठाउं रक टाइपका गीतमा भिडियो बनाउन गज्जब हुने अनुभव निर्देशक श्रेष्ठसंग छ । छिट्टै पहिलो एल्बम निकाल्ने तयारी गरिरहेका युवा नवराज घलेले भिडियोका लागि तीनवटा स्पोर्टस् बाइक र एउटा कारको प्रयोग गरिएको जनाए । र्याप गीत भएकाले त्यस्तो लोकेशन खोजिएको हो । भिडियो निर्माणमा कुनै सम्झौता नगरिएको निर्माण पक्षको दावी छ ।
निर्देशक श्रेष्ठले उक्त भिडियोमा सारा सिरपाली, सुशील थापा र प्रवीन गुरुङलाई अभिनय गराएका छन् । श्रेष्ठले निर्देशन गरेको गायिका अन्जु पन्तको “जुनी जुनी” को भिडियो अहिले निकै चर्चामा छ ।
