काठमाडौँ, १३ वैशाख । राष्ट्रपति विद्यादेवी भण्डारी समक्ष सभामुख ओनसरी घर्तीले संसद्को आगामी बर्खे अधिवेशन यही वैशाख २१ गते बोलाउन परामर्श दिनुभएको छ ।
राष्ट्रपति भण्डारी समक्ष संसद् सचिवालय मार्फत सो दिन अपराह्न ४ बजेका लागि अधिवेशन बोलाउन सभामुखले लिखित परामर्श दिएको सभामुखका प्रेस सल्लाहकार बबिन शर्माले जानकारी दिनुभयो । सरकारको सिफारिसमा राष्ट्रपतिले संसद्को अधिवेशन आह्वान गर्ने परम्परा रहे पनि संसद्को बैठक बोलाउने र अन्त्य गर्ने विषयमा सभामुखले परामर्श दिने विगतदेखिकै अभ्यास हो ।
नेपालको संविधानमा किटान गरेरै जेठ १५ गते बजेट प्रस्तुत गर्नुपर्ने समय तोकिएको हुँदा पूर्वबजेट छलफलको पक्षलाई समेत ध्यान दिएर सभामुखले संसद् अधिवेशन बोलाउने बारे परामर्श दिनुभएको हो । बजेट अधिवेशनका रुपमा रहने भए पनि आगामी बर्खे अधिवेशनमा व्यवस्थापिका–संसद् कार्य सञ्चालन नियमावली पारित गर्नाका साथै संविधान कार्यान्वयनलाई सहयोग पुग्ने धेरै ऐन निर्माण गर्नुपर्ने दायित्व छ ।
