लन्डन । ‘अपाङ्गता अधिकार र विकासका लागि क्रियाशील नेपाल’ नामक संस्थाले अन्तर्राष्ट्रिय पुरस्कार प्राप्त गर्न सफल भएको छ । लन्डन पुस्तक महोत्सवमा पहुंचयुक्त परिसङ्घ विशिष्ट अन्तर्राष्ट्रिय पुरस्कार र अस्ट्रियाको भियनामा ‘समावेशी शिक्षा र नवीनतम सूचना प्रविधिको प्रयोगबारे सिर्जनशील अभ्यास’ विधामा संस्थाका अध्यक्ष वीरेन्द्रराज पोखरेलले पुरस्कार प्राप्त गरेका हुन् ।
अन्तर्राष्ट्रिय पुरस्कारका विषयमा जानकारी दिन काठमाण्डौंमा आयोजित अन्तक्र्रियामा एमाले वरिष्ठ नेता माधवकुमार नेपालले मुलुकको समस्या समाधान गर्न सबैले देश र जनतालाई प्राथमिकतामा राखेर जिम्मेवार भई भूमिका निर्वाह गर्नुपर्ने बताएका छन् । मुलुकमा अहिले प्रधानमन्त्री को हुने भनी बहस गर्नुभन्दा पनि भ्रष्टाचार र ढिलासुस्ती अन्त्य गरी सबैको सहकार्यबाट मुलुकको समस्या हल गर्नुपर्ने बताए ।
नेता नेपालले संविधानले अपाङ्गता भएकाहरुलाई विशेष पहिचान दिएको र अब यसको कार्यान्वयनमा लाग्नुपर्ने बताउंदै अपाङ्गता भएकाले राज्यले पाउनुपर्ने सुविधाबाट वञ्चित हुन नहुने र उनीहरुलाई कसैले पनि उपेक्षा गर्न नहुने विचार व्यक्त गरे ।
अध्यक्ष पोखरेलले डिजिटल श्रव्य पुस्तक र ट्याब्लेट प्रयोगबाट शैक्षिक क्रियाकलाप अगाडि बढाइरहेको जानकारी दिँदै अपाङ्गता भएका व्यक्तिको प्रगति मुलुकको गौरव भएको बताए ।
पोखरेलको विद्यावारिधि उपाधिका लागि शोध सहनिर्देशक प्रा डा मङ्गलादेवी श्रेष्ठले आफ्ना विद्यार्थीले अन्तर्राष्ट्रिय पुरस्कार प्राप्त गरेकामा आफू गौरवान्वित भएको बताइन् ।
