बेलायतमा रुचाइयो रामजी देबिकाको जोडी

लन्डन । यतिखेर नेपाली राष्ट्रिय कलाकारको निक्कै भीड छ बेलायतमा । नयां वर्ष मनाउने कार्यक्रममा आएका आधा दर्जन कलाकारले विभिन्न शहरमा आफ्नो गायन प्रस्तुत गरिरहेका छन् ।

नायिका प्रियंका कार्की तीनवटा कार्यक्रममा सहभागी भएर फर्किएपनि बांकी कलाकार शिव परियार, हेमन्त शर्मा, रामजी खांड, देबिका केसी, शम्भु राई आदि कार्यक्रम गर्न साता पिच्छे व्यस्त छन् । नायक दयाहाङ राईलाई भने आफ्नो फिल्म ‘बीर बिक्रम’ को प्रिमियर शोले व्यस्त बनाएको छ ।

लोकप्रिय दोहोरी कलाकारद्वय रामजी खांड र देबिका केसीको गायनले यतिखेर बेलायत दोहोरीमय बनेको छ । उनीहरुले दोहोरी गाएर दर्शक नचाइरहेका छन् ।

५ हजार बढि गीत गाइसकेका खांडले ‘फूल फूलेर पयांलै भयो…’, ‘सालैजो…’ अनि पन्चे बाजाका साथ ‘काफल पाक्यो…’ गीत गाएर दर्शक मन जितेका हुन् । गायिका देबिका केसीको चाहिं ‘बाजी ठोकम आउ झिल्के…’ ले धेरै झिल्केहरुलाई लट्ठ पारिदिएको छ ।

शान्ति समाज बेलायतको निम्तोमा बेलायत आएका रामजी र देबिकाको जोडीले अहिलेसम्म बर्मिङघम, अल्डरसट, नटिङघम, उलवीच, प्लमस्टिडमा पटक पटक कार्यक्रम गरिसकेको छ भने अझै ६ शहरमा कार्यक्रम गर्न बांकी रहेको खांडले जनाएका छन् । ‘बेलायत लोक दोहोरीको उर्वरभूमि नै रहेछ’, खांडले भने, ‘दर्शकहरुको लोकगीतप्रतिको लगावले हामीलाई थप हौसला मिलेको छ ।’