सभामुख घर्तीसहित प्रमुख दलका सचेतक लन्डनमा

लन्डन । सभामुख ओनसरी घर्तीमगरसहित प्रमुख दलका सचेतकहरु आइतबार बिहान लन्डन उत्रिएका छन् । बिहान हिथ्रो एयरपोर्ट लन्डनमा उनीहरुलाई बेलायतका लागि कार्यवहाक राजदूत तेजबहादुर क्षेत्री, थर्ड सेक्रेटरी बाबुकाजी डंगोल र ब्रिटिश ग्रुप इन्टर पार्लियामेन्ट्री युनियन पदाधिकारीले स्वागत गरेका थिए । युनियनले१८ देखि २३ सम्म हुने औपचारिक भ्रमणका लागि बोलाएको हो ।

प्रतिनिधिमण्डलमा सभामुखसहित नेपाली कांग्रेसका प्रमुख सचेतक चीनकाजी श्रेष्ठ, नेकपा (एमाले) का प्रमुख सचेतक भानुभक्त ढकाल, एनेकपा (माओवादी) का प्रमुख सचेतक हितराज पाण्डे र राष्ट्रिय प्रजातन्त्र पार्टीका प्रमुख सचेतक दीलनाथ गिरी छन् ।

सभामुखको टोलीमा संसद् सचिवालयका महासचिव मनोहरप्रसाद भट्टराई र सचिव मुकुन्दप्रसाद शर्मा समेत छन् ।

प्रतिनिधिमण्डलले बेलायतको संसदीय अभ्यासका बारेमा जानकारी लिनुका साथै तल्लो र माथिल्लो सदनका आफ्ना समकक्षीसंग भेटवार्ता गर्ने कार्यक्रम छ ।

सभामुख घर्तीसंग आजै गैर आवासीय नेपाली संघ, बेलायत र गोर्खा सत्याग्रह संयुक्त संघर्ष समितिले अन्तरक्रिया कार्यक्रम राखेका छन् ।