बेलायतको सांगीतिक टुरमा नेपाली ब्याण्ड नाइट

लन्डन । यतिखेर बेलायतको सांगीतिक टुरमा छ नेपाली ब्याण्ड ‘नाइट’ । उसले बेलायतका विभिन्न शहरमा आफ्नो सांगीतिक प्रस्तुति दिइरहेको आयोजक मेकिङ ट्रयाक्सले जनाएको छ ।

ब्याण्डले अहिलेसम्म ब्राइटन डोम ब्राइटन, बरी सेन्ट एडमन्ड्स, न्यू क्यासल, मिल्टन केन्स् र बर्मिङ्घममा आफ्नो संगीत प्रस्तुत गरिसकेको छ भने आगामी १५ अप्रिलमा म्यानचेष्टर, १६ मा क्यामब्रीज र १७ अप्रिलमा लन्डनमा कार्यक्रम गर्दैछ ।

यूकेस्थित नाम्लो ब्याण्डमा आवद्ध गायक तथा संगीतकार गंगा थापाले नाइट ब्याण्डको लाइभ परफर्मेन्स बेलायतमा बिरलै हुने भएकाले नेपाली संगीतप्रेमीहरुलाई त्यो अवसर नछुटाउन आग्रह गरेका छन् ।

लोपोन्मुख नेपाली बाजा र संगीतको संरक्षण तथा प्रवर्धनमा जुटेको नाइटले बेलायती समुदायमा समेत राम्रो प्रभाव पारिरहेको छ । बीबीसी रेडियो थ्रीले गत ८ अप्रिलमा ब्याण्डबारे एउटा विशेष कार्यक्रम नै बनाएर प्रसारण गरेको थियो ।

नाइट ब्याण्ड स्वदेश मात्र होइन, विदेशमा भएका विश्व संगीत महोत्सवमा समेत सहभागी भइसकेको छ । उसले उज्बेकिस्तानमा आयोजित सार्क टारोनलरी महोत्सव र गत वर्ष अगष्टमा बेलायतमै साम्बला महोत्सवको मुख्य स्टेजमा आफ्नो कला प्रस्तुत गरेको थियो ।

उक्त ब्याण्डले नेपालको ग्रामीण भेग पुगेर त्यहांको परम्परागत बाजालाई आधुनिक संगीतसंग फ्युजन गरेर प्रस्तुत गर्ने गर्छ । उसको पहिलो एल्बम ‘अनि उकालीसंगै आरोली…’ ले ग्रामीण क्षेत्रमा बस्ने नेपालीहरुको वास्तविकता उजागर गरेकाले व्यापक चर्चा बटुलेको थियो ।