रेष्टुरेन्ट उद्घाटन 
गर्दै लर्ड प्रोभोष्ट रोबिन्स्

लन्डन । व्यवसायी काशीराम भण्डारीको लगानीमा स्कटल्याण्डमा 
अर्को नयां रेष्टुरेन्ट खुलेको छ । स्टर्लिङ शहरको केन्द्रमा अवस्थित नमस्ते स्टर्लिङ वर्ल्ड बफेट रेष्टुरेन्टको सोमबार मध्यान्ह प्रमुख अतिथी लर्ड प्रोभोष्ट माइक रोबिन्स् ले उद्घाटन गरेका हुन् ।

उद्घाटन समारोहमा लर्ड प्रोभोष्ट रोबिन्स् ले शुभकामना व्यक्त 
गर्दै आफ्नो शहरमा नेपाली व्यवसाय विस्तार भएकामा प्रसन्नता व्यक्त गरे । उनले रेष्टुरेन्टले स्वादिष्ट खाना पस्कने अपेक्षा समेत व्यक्त गरेका थिए ।

२०० सिट क्षमताको उक्त रेष्टुरेन्टमा झण्डै तीन लाख पाउण्ड लगानी शुरु भएको छ । स्टर्लिङमा मल्टी कुजिन खाना उपलव्ध गराउने गरि नेपालीले खोलेको यो नै पहिलो रेष्टुरेन्ट मानिएको छ ।

भण्डारीका स्कटल्याण्डमा चारवटा रेष्टुरेन्ट सञ्चालनमा 
छन् । उनको सिमला प्यालेस अत्यधिक चल्ने रेष्टुरेन्ट मानिन्छ । स्कटल्याण्डको स्थानीय समुदायमा राम्रो प्रभाव बनाएका भण्डारीको यसअघि खुलेको रेष्टुरेन्ट पूर्व बेलायती प्रधानमन्त्री गोर्डन ब्राउनले उद्घाटन गरेका थिए । भण्डारीले स्कटल्याण्डमा नेपाली रेष्टुरेन्ट खोलेर धेरैलाई रोजगारी दिंदै आएका छन् ।