इन्धन अभावमा मानवीय सहायताका काम प्रभावित

काठमाडौँ, ८ कात्तिक । ललितपुरस्थित राष्ट्रसङ्घीय मानवीय समन्वयकर्ताको कार्यालयले इन्धन अभावका कारण मानवीय सहायताका काम नराम्ररी प्रभावित भएकामा चिन्ता र चासो प्रकट गरेको छ ।

कार्यालयका मानवीय समन्वयकर्ता जेमी म्याक गोल्डरिकले आज विज्ञप्ति जारी गरी भूकम्पपछिका छ महिनामा झन्डै सात लाख भूकम्पपीडितलाई आवास र खाद्य सामग्रीको व्यवस्था गरिएको तर शिशिर यामको आगमनसँगै चुलिएको चरम इन्धन अभावले विकट हिमाली भेगका प्रभावितलाई सहायता सामग्री आपूर्ति गर्न कठिन भएको बताएका छन् ।

मानवीय सहायता समुदाय भूकम्पपीडितको सहयोगका लागि प्रतिबद्ध रहेको र अरु ८० हजार परिवारलाई आवास र खाद्य सुरक्षा सुनिश्चित गर्न बाँकी रहेको जनाउँदै उनले विज्ञप्तिमा पछिल्लो समयमा उत्पन्न इन्धन अभावले मानवीय सहायोगका कामको प्रगतिमा बाधा भएको बताइ ।

इन्धन आपूर्ति समस्या समाधान हुने विश्वास व्यक्त गर्दै उनले पुनःनिर्माण प्राधिकरण शीघ्र गठन हुने अपेक्षा मानवीय सहायता समुदायले गरेको विज्ञप्तिमा उल्लेख गरेका छन् ।

यसैबीच राष्ट्रसङ्घीय कृषि तथा खाद्य सङ्गठन (एफएओ)ले भूकम्पबाट अतिप्रभावित सिन्धुपाल्चोक, नुवाकोट, धादिङ, गोरखा र रसुवाका पीडितलाई सरकारी नेतृत्वको सहायता टोलीसँग मिलेर निरन्तर सहयोग गरिरहेको जनाएको छ ।

आपत्कालीन सहायताअन्तर्गत ४२ हजार ‘पाँच किलोग्राम धानका बीउयुक्त थैली’ किसानलाई उपलब्ध गराउनाका साथै उच्च पोषणयुक्त चौपाया आहार र ५० हजार परिवारलाई सागसब्जीका बीउ हस्तान्तरण गरिएको सङ्गठनको यहाँस्थित कार्यालयले आज जारी गरेको प्रेस विज्ञप्तिमा उल्लेख छ ।

नेपालको दक्षिणी सीमानाकामा जारी नाकाबन्दीले बीउबिजन, मलखाद र अन्य कृषि उपकरण आयातमा अवरोध भएको उल्लेख गर्दै विज्ञप्तिमा प्रभावित जनसमुदायसम्म ती सामग्री पु¥याउन सरकारसँगको साझेदारीमा वैकल्पिक प्रयास पनि भइरहेको जनाइएको छ ।