चित्र लिएर आइन् आरजु

Arju

लन्डन । मनदेखि नै लगाव भए केही काम गर्न समय र पैसाले रोक्दैन । आरजु सन्जेल लन्डनमा अध्ययनरत अकाउन्टको विद्यार्थी हुन् तर उनको कलाप्रतिको समर्पण उत्तिकै बढि छ । उनले यूकेको व्यस्तताबीच लन्डनमा चित्रकला 
प्रदर्शनी गर्ने सोच यथार्थमा परिणत गरेरै छाडिन् । लन्डनस्थित नर्थहोल्ट लाइब्रेरीमा गत मंगलबार देखि उनको एकल चित्रकला प्रदर्शनी शुरु भएको छ जुन आगामी मंगलबारसम्म रहनेछ । प्रदर्शनीमा एक दर्जन चित्र टांगिएका छन् ।

प्रदर्शनीमा रहेका मध्ये ९ वटा चित्र चारकोल र ग्राफीट अनि बांकी तीनवटा पानी 
रंग र पेस्टल मिश्रणबाट बनाइएको आरजुले जनाइन् । ए थ्री र ए फाइभ साइजका ति चित्रले नेपालको प्रकृति समेत झल्काएका छन् । नेपालको लेक पनि उनको प्रदर्शनीमा समावेश छ । १८ वर्ष देखि उनले चित्र कोर्न थालेकी हुन् । एसीसीएको तीनवटा पेपर सकिएपछि उनी कलातिर झन् बढि समर्पित भइन् । १८ वर्ष छंदा उनलाई फोटोग्राफीको नशा समेत चढेर डिएसएलआर क्यामेरा नै किनेकी आरजु जीवनमा केही पृथक कुरा गर्न सधैं हौसिन्छिन् । फुर्सदमा उनी नयां प्रविधिबारे जान्न बुझ्न यूट्युव हेरिरहन्छिन् । सप्ताहन्त पुस्तकालयमा गएर कला सम्वन्धि पुस्तक अध्ययन उनको बानी हो । चित्र कोर्ने बेला यदाकदा कल्पनामा हराउंछिन् उनी । महिला, प्रकृति उनका रोजाइका विषयमा 
पर्छन् ।

हाल एसीसीएको विद्यार्थी भएपनि आर्ट विषय अध्ययनका लागि उनी 
अर्को वर्ष विश्वविद्यालय जाने सोचाइमा छिन् । बाबा देवकृष्ण सन्जेल र आमा मिरा खतिवडा सन्जेलकी सुपुत्री आरजु काठमान्डूमा जन्मिएकी हुन् ।

प्रतिक्रिया

सम्बन्धित सामाग्री