यू टर्नका कलाकारलाई लिमोजिन र रेड कार्पेट सम्मान

 

लन्डन । बेलायतमै निर्मित नेपाली कथानक चलचित्र यू टर्नको रेड कार्पेट प्रिमियर शो गत शनिवार रेडिङमा भएको छ । रेडिङस्थित लाइफ इस्प्रिङ चर्च द पेभिलियनमा आयोजित भव्य समारोहमा लिमोजिनमा ल्याइएका कलाकारहरु रेड कार्पेट हुंदै रिसेप्सनमा सहभागी भए । उक्त अवसरमा स्याम्पेन फोडियो, कलाकार र दर्शकले एकापसमा शुभकामना बांडे ।
शोमा प्रमुख अतिथी एनआरएनए यूके अध्यक्ष मुछेत्र गुरुङ र विशेष अतिथी चन्द्र सागर लामाले फिल्मका कलाकार, प्राविधिक लगायत सहयोगीलाई सिने अवार्डले सम्मान गरे ।

सरला थापाले सञ्चालन गरेको उक्त प्रिमियरमा करिब अढाइ सय सहभागी थिए । विदेशीएका नेपालीको कथा समेटिएको उक्त फिल्म प्रेम लामाले निर्देशन गरेका हुन् । २४ वर्ष देखि बेलायत बस्दै आएका लामा निर्देशित यू टर्न तेश्रो फिल्म हो । यसअघि उनले मेनिका र कसुर बनाएका थिए ।

यूटर्नमा विदेशीएका नेपालीको कथा छ । विदेश रहंदाका तीता मिठा भोगाइ चलचित्रले उजागर गर्ने प्रयास गरेको छ । प्रिमियर शोमा पुगेका दर्शकले प्रविधि र कथावस्तुका हिसावले यू टर्न लामाको यसअघिका दुई फिल्मभन्दा उत्कृष्ट रहेको प्रतिक्रिया दिएका थिए । निर्देशक लामा पनि यस फिल्मबाट बढि आशावादी देखिन्छन् ।

उक्त फिल्म प्रेमिस भिजनका लागि तारा लामाले प्रस्तुत गरेकी हुन् भने निर्माता दिनेशकुमार लामा छन्् । संगीत सुरेश अधिकारी र छायांकन कुशल श्रेष्ठ एवं विसन गुरुङको छ । यू टर्नमा निता पुन, इतिसा नेम्वाङ राई, प्रेम लामा, दीपक गुरुङ लगायत बेलायतकै स्थानीय नेपाली कलाकारको अभिनय छ । करिब तीस हजार पाउण्ड (५० लाख रुपैयां) लगानीमा बनेको यू टर्न बेलायतका विभिन्न शहर र पछि नेपालमा समेत प्रदर्शन गरिने फिल्म निर्माण पक्षले जनाएको छ ।

 

तस्विरहरुः के के मुभिज प्रोडक्शन