आमाको दशौं तीज भव्य

लन्डन । एजियन महिला एसोसिएसन (आमा) को दशौं तीज पार्टी गत १२ सेप्टेम्बर भव्य रुपमा सम्पन्न भएको छ । करिब ९ सय सहभागी दिदीबहिनीबीच सामुयल कोडी स्पोर्टस् सेन्टर, फार्नबोरोमा कार्यक्रम भएको हो ।
कार्यक्रममा भूकम्पपछि प्रभावित क्षेत्रमा खटिएर योगदान 
गर्ने समाजसेवी महिला सरला थापा र अर्की नेपालप्रेमी अन्ना फ्रोस्ट अतिथीका रुपमा थिए । उनीहरुले पानसमा दीप प्रज्वलन गरि तीज पार्टी उद्घाटन गरेका थिए । फ्रोस्ट फार्नबोरोमा नेपाली महिलालाई हस्तकला सिकाइरहेकी छिन् ।
कार्यक्रमको शुरुमा तीज कार्यक्रम शुरु भएको दशौं वर्षको उपलक्ष्यमा केक काटिएको थियो । उक्त अवसरमा आमाको गतिविधि प्रोजेक्टरमार्फत देखाइएको थियो ।
तीन पुस्ताबीच गराइएको नृत्य प्रतियोगितामा वेष्ट डान्सर हजुरआमा शिवदेवी सेन, वेष्ट डान्सर आमा रेखा कार्की, वेष्ट डान्सर छोरी रुवी गुरुङ र वेष्ट डान्सर छोरी सान्त्वना पांच वर्षीया श्रेया थापाले जिते । चर्चित नृत्याङना रश्मी पोखरेल र आमाकी सदस्य दुर्गा पुनको नृत्य हेर्न लायक थियो ।

तीज पार्टीमा राफल चिट्ठा समेत सञ्चालन गरिएको थियो जसमा सुमना श्रेष्ठले प्रथम उपहार सुनको सिक्का जितिन् भने दोश्रो पुरस्कार प्रेमकुमारी गुरुङ, तेश्रो शान्ता गुरुङ, चौंथो दीप गुरुङ, पांचौं गंगा गुरुङ र छैठौं पुरस्कार नवीना सुनारले जिते । उक्त राफलबाट संकलित रकम एकहजार तीस पाउण्ड संस्थाले भूकम्प पीडितहरुका लागि प्रदान गर्ने भएको महासचिव विभा गुरुङले जनाइन् । उक्त कार्यक्रम आमाकी अध्यक्ष अम्बिका खड्काको सभापतित्वमा सञ्चालन भएको थियो ।

आमाले यसअघि विभिन्न सामाजिक गतिविधि गरिसकेको छ । महिला सशक्तिकरणका लागि सन् २००६ मा स्थापित आमाले सन् २०१० मा माइती नेपाललाई ७० हजार रुपैयां, सन् २०१४ मा बाढी पीडितका लागि बीएफबीएस् गोर्खा रेडियो नेपाल मार्फत एक लाख रुपैयां र गत वर्ष एनआरएनए यूके मार्फत वृद्धाश्रमका लागि २२० पाउण्ड सहयोग प्रदान गरेको थियो ।

आमाले पहिलो पटक यसै वर्ष ‘वुमेन्स् डे’ गरि आर्थिक संकलन गरेको थियो । संकलित रकम मध्येबाट रक्षा नेपाल र ब्लड क्यान्सर पीडित अन्जु कार्कीलाई सहयोग प्रदान गरिएको छ । आमाले यही साल रेस फर लाइफमा सहभागी भएर ९६५ पाउण्ड ५० पेन्स् संकलन गरेकामा ५०० पाउण्ड क्यान्सर रिसर्चलाई दिइसकेको छ ।