एएफपी
आदिस आबाबा, १२ साउन । अमेरिकी राष्ट्रपति बाराक ओबामाले मङ्गलबार अफ्रिकी युनियनमा सम्बोधन गर्ने भएका छन् ।
उनले मङ्गलबार इथियोपियामा रहेको सो युनियनमा विशेष सम्बोधन गर्ने बताइएको छ । युनियन अध्यक्षले सो विषयमा जानकारी दिएका हुन् ।
राष्ट्रपति ओबामा आइतबार अबेर राति इथियोपियाको राजधानी आदिस आबाबा पुगेका छन् । अमेरिकी राष्ट्रपतिबाट दुर्लभै मात्र हुने यी अफ्रिकी राष्ट्रहरुको भ्रमणका लागि उनी त्यसतर्फ लागेका हुन् ।
अमेरिकी राष्ट्रपति ओबामा यस युनियनलाई सम्बोधन गर्ने पहिलो अमेरिकी राष्ट्रपति हुने पनि समाचारमा जनाइएको छ ।
उनी पूर्वी अफ्रिकन देशहरुको औपचारिक भ्रमणको क्रममा केन्याको ऐतिहासिक दुईदिने भ्रमण पूरागरी आइतबार इथियोपिया पुगेका थिए । ओबामा यी अफ्रिकी देशहरुको भ्रमणगर्ने प्रथम अमेरिकी राष्ट्रपति हुन् । उनले यसअघि इथियोपियाको छिमेकी देश केन्याको भ्रमण गरेका थिए ।
ओबामाले आदिस आबाबास्थित अफ्रिकी युनियन (एयु) को मुख्यालयको भ्रमण गर्ने कार्यक्रम रहेको जानकारी यसअघि नै दिइएको थियो ।
यसअघि उनले एयुको अध्यक्षसँग द्वीपक्षीय वार्तासमेत गरिसकेका छन् । त्यस क्रममा उनले उक्त युनियनमा अफ्रिकी राष्ट्रहरुका लागि अमेरिकाको सहयोगका साथै शान्ति सुरक्षा र मानवअधिकारका बारेमा आफ्ना धारणा राखेका थिए ।
उनले सोमबार नै इथियोपियाका प्रधानमन्त्री हेलमारिन देसागेनसँग भेटवार्ता गरिसकेका छन् । देसालेन दुई महिनामात्र अघि सत्तामा आएका थिए ।
सो भेटका क्रममा उनले इथियोपियाले आर्थिक विकासका मार्गहरु तय गरिसकेको भन्दै अब अगाडि बढ्नुपर्ने सुझाएका थिए ।
साथै उनले त्यहाँ मानवअधिकारको संरक्षण र सम्बर्धन गर्न आवश्यक रहेको भन्दै यसका लागि पनि गम्भीर बन्न आग्रह गरेको बताइएको छ ।
