बलिउड नायिका मनिषा भूकम्प पीडितको सहयोगार्थ च्यारिटीमा

लन्डन । बलिउड नायिका मनिषा कोइराला मंगलबार राती लन्डनमा आयोजित एउटा च्यारिटी कार्यक्रममा सहभागी भइन् ।

सेन्ट पल्स्स्थित ग्रेन्ज होटलमा नेपालका भूकम्प पीडितको सहयोगार्थ गरिएको च्यारिटीमा मनिषा सहभागी भएका हुन् । मनिषा १६ जुलाई देखि शुरु छैटौं लन्डन इन्डियन फिल्म फेस्टिबल २०१५ का लागि लन्डनमा छिन् ।

मन्तव्यका अवसरमा महिला र वालवालिकाका लागि आफ्नो सहयोग स्मरण गर्दै उनले अन्यलाई पनि सहयोगका लागि अनुरोध गरेकी थिइन् ।

च्यारिटीका अवसरमा बलिउड निर्देशक मणी रत्नमसहित कयौं बलिउड सेलिब्रेटी, रग्बी खेलाडी र बेलायतीहरुको सहभागिता रहेको सहप्रायोजक खुकुरी बियरका बजार निर्देशक प्रशान्त कुंवरले जनाए ।

नेपालको विशिष्ट राजनीतिक कोइराला परिवारमा जन्मिएकी मनिषाले बलिउडमा दर्जनौं चलचित्रमा अभिनय गरेकी छिन् । अमेरिकामा क्यान्सरको उपचार गरेर आएपछि उनी पुनः अभिनयमा फर्किने तरखर गर्दैछिन् ।

संयुक्त राष्ट्रसंघले उनलाई गुडवील एम्बासेडर बनाएको छ भने नेपाल सरकारले भूकम्प पुनर्निर्माणमा सहयोग जुटाउन दूत नियुक्त गरेको छ ।