लन्डन । रेडिङस्थित वृद्ध भूपू गोर्खाहरु आफ्नो स्वास्थ्य समस्याबारे चिकित्सकलाई भन्न असक्षम रहेको प्रतिवेदन सार्वजनिक भएको छ । रेडिङ बरो काउन्सिलको निगरानीमा हेल्थ वाच रेडिङले गरेको सर्वेक्षणले ८५ प्रतिशत भूपू गोर्खाले चिकित्सकलाई आफ्नो स्वास्थ्य समस्या र लक्षण बताउन नसक्ने उजागर गरेको छ ।
रेडिङस्थित दुई हजार ७२५ जना भूपू गोर्खा वृद्धवृद्धामाझ सर्वेक्षण भएको हो ।
त्यस्तै, सहभागीमध्ये ८१ प्रतिशतले दोभाषेसित सूचीकृत नभएको, ९५ प्रतिशतले आंखा परिक्षण गराउंदा दोभाषे नदिएको र ८१ प्रतिशतले दोभाषे चाहेको बताएका प्रतिवेदनमा उल्लेख छ । रोयल बर्कसायर हस्पिटल र जिपी सर्जरी जांदा ति वृद्धवृद्धाले दोभाषे सेवा नपाएको प्रतिवेदन देखाउंछ । रोयल बर्कसायर हस्पिटलले भने हेल्थ वाचलाई दुई साताको अग्रिम सूचना पाए दोभाषे उपलव्ध गराइने बताएको छ । तर, हस्पिटलमा विरामीको सुविधाका लागि नेपाली भाषामै लिफलेट उपलव्ध रहेको उल्लेख छ ।
सर्वेक्षण गरिएका मध्ये अधिकांश मधुमेह, मुटु रोग, युरिक एसिड र रक्तचाप सम्वन्धि रोगले पीडित छन् । कतिपयमा सेवाका बेला युद्ध मैदानमा बन्दुक, बमको आवाजले गर्दा अहिले श्रवण शक्ति कम रहेको पाइएको छ ।
हेल्थ वाच रेडिङको उक्त प्रतिवेदन अनुसार, रेडिङ बस्ने ६० देखि ७५ वर्ष उमेर समूहका वृद्धवृद्धा नेपालको दुर्गम गाउंबाट आएका हुन् । आफ्ना सन्तान नेपाल भएकाले उनीहरुले यहां पारिवारिक रेखदेख नपाएको प्रतिवेदनमा उल्लेख छ । अधिकांश भूपू गोर्खाका श्रीमतिहरु साक्षर नभएकाले उनीहरुलाई अंग्रेजी समस्या भएको पनि सर्वेक्षणले बताएको छ ।
प्रतिवेदनले धेरै गोर्खा परिवार न्यून आयमा बांचिरहेको, अर्काले लिएको घर भाडामा बसेको र कतिपय त हिटिङ सुविधा लिन समेत असमर्थ रहेको देखाएको छ । तर, ति वृद्धवृद्धालाई रेडिङस्थित भूपू गोर्खा संगठन र अन्य सामुदायिक संघसंस्थाले भने साथ दिएको जनाइएको छ ।
यसैबीच, रेडिङ एनएचएस वाक इन सेन्टरले नेपाली बोल्ने विरामीहरुलाई जनचेतना जगाउन कफी मर्निङ राख्ने योजना बनाइरहेको छ ।
उक्त प्रतिवेदन आजै अबेर काउन्सिलको हेल्थ एण्ड वेल बीइङ बोर्ड समक्ष प्रस्तुत हुने र उसले यसबारे समिक्षा गर्ने गेट रेडिङले जनाएको छ ।
