आफ्ना रचना सुनाएर भूकम्प पीडितलाई सहयोग

लन्डन । एउटा तप्का छ जो गीत, गजल अनि मुक्तक सुन्न परे सात कोस टाढा भाग्छ । कतिपय चाहिं साहित्यकारका गफ सुन्नु पर्दा नाक खुम्च्याउंछन् । तर, श्रष्टाहरु आपत विपतमा अग्रपंक्तिमै रहेका उदाहरण प्रशस्त छन् ।

शनिवार लन्डनस्थित नेपाली दूतावासमा एउटा नौलो कार्यक्रम भयो । नौलो यस अर्थमा कि, मानिसहरु टिकट किनेर गीत, गजल अनि मुक्तक श्रवण गर्न पुगे ।

२०१ औं भानु जयन्तीका अवसरमा आयोजित ‘समाजका लागि सिर्जना’ नामक च्यारिटी कार्यक्रममा आफ्ना रचना सुनाएरै बेलायतस्थित नेपाली साहित्यकारहरुले ७८० पाउण्ड (करिब रु एक लाख २३ हजार) संकलन गरे र तत्काल कार्यवहाक 
राजदूत तेजबहादुर क्षेत्रीलाई हस्तान्तरण गरे । उक्त रकम अनेसास यूके अध्यक्ष डा. रुपक श्रेष्ठ र नेपाल मुक्तक प्रतिष्ठान यूके अध्यक्ष दुर्गाप्रसाद पोख्रेलद्वारा 
संयुक्त रुपमा का.वा. राजदूत क्षेत्रीमार्फत प्रधानमन्त्री राहत कोषका लागि प्रदान गरिएको हो ।

नेपाल मुक्तक प्रतिष्ठान यूके तथा अन्तर्राष्टिय नेपाली साहित्य समाज (अनेसास) यूके को संयुक्त आयोजनामा कार्यक्रम भएको हो ।

कार्यक्रममा नेपाल मुक्तक प्रतिष्ठान यूके तथा अनेसास यूकेका 
पदाधिकारीहरू लगायत यूकेका विभिन्न स्थानबाट आएका लव्ध प्रतिष्ठित संगीत कला साहित्यानुरागीहरूको विशेष उपस्थिति थियो ।