१६ तालिवान आतङ्ककारी मारिए

कुन्दुज (अफगानिस्तान), १९ असार । अफगानिस्तानको उत्तरी प्रान्त कुन्दुजको दास्त इ आर्ची पुनःकब्जाको लागि सरकारी सुरक्षाबलले जारी राखेको कारबाहीको क्रममा शुक्रबार १६ जना तालिवानी आतङ्ककारी मारिएका छन् ।

प्रान्तीय सरकारका प्रवक्ता अब्दुल वाडोओदले शनिबार सो जानकारी दिएका हुन् ।

दास्त इ आर्चीमा शुक्रबार बिहानबाट सुरु भएको सो कारबाहीका क्रममा १६ तालिवान बिद्रोहीको मृत्यु हुनुको साथै अन्य कैयाँै घाइते भएका वाडोओदले समाचारदातालाई बताए ।

तालिवान विरुद्ध दुई दिनसम्म जारी सो भीषण कारबाहीका क्रममा चार जना सुरक्षा अधिकारी भने घाइते भएका छन् ।

यद्यपि तालिवानका प्रवक्ता जाबिहुल्लाह मुजाहिदले सो जिल्लाको प्रमुख कार्यालय अझै पनि तालिवान आतङ्ककारीको कब्जामा रहेको पुष्टि गरेका छन् ।

तालिवान आतङ्ककारी समूहले दुई हप्ता अगाडि नै चर्दारा र दास्त ई आर्ची जिल्ला कब्जा गरेका थिए ।

सरकारी सुरक्षाबलले सो जिल्लाहरु पुनः कब्जाको लागि जारी राखेका कारबाहीको क्रममा चर्दारा भने पुनः कब्जा गरिसकेका र दास्त ई आर्ची पुनः कब्जाको लागि कारबाही जारी रहेको बताइएको राससले सिन्ह्वालाई उधृत गर्दै जनाएको छ ।

प्रतिक्रिया

सम्बन्धित सामाग्री