हजारौं प्रतिष्पर्धीलाई उछिन्दै खगेन्द्र बने बेलायती सेनाका उत्कृष्ट ‘सार्प सुटर’

लण्डन । बेलायती सेनाभित्र हरेक वर्ष हुने राष्ट्रिय सुटिङ प्रतियोगितामा गोरखा सैनिक सार्जेन्ट खगेन्द्र तामाङ उत्कृष्ट ठहरिएका छन् ।
इम्फाल ब्यारेकका तामाङले द आर्मी अपरेसनल सुटिङ प्रतियोगितामा उत्कृष्ट भए वापत क्वीन्स मेडल प्राप्त गरेका छन् । उनलाई राजकुमार आन्ड्रयूले सो पदक हस्तान्तरण गरेको बेलायती सैनिकको आधिकारिक फेसबुक पेजमा आज उल्लेख छ ।
अन्तर्राष्ट्रिय सैनिक टोलीहरुले पनि भाग लिएको सो प्रतियोगितामा वर्चस्व भने बेलायतको सैनिक टोलीको रहृयो ।
प्रतियोगिताको फाइनल खेल बेलायतको सरे काउन्टीअन्तर्गतको बिज्लेस्थित नेशनल राइफल एसोसिएसनको मुख्यालयमा भएको थियो ।
प्रतियोगितामा बेलायत र बेलायत बाहिर अवस्थित बेलायती सेनाका हरेक युनिटले भाग लिने गर्दछन् । पूर्व गोरखा सैनिक बसन्त गुरुङका अनुसार सो प्रतियोगितामा हरेक सैनिकहरुले भाग लिन्छन् र उनीहरुबाट छानिएकाहरु उच्चस्तरको प्रतियोगितामा जाने गर्दछन् ।
युकेसित करिब ९० हजार सैनिक छन् ।
बेलायती सेनाको आधिकारिक फेसबुक पेजका अनुसार करिब १ हजार प्रतिष्पर्धीले भाग लिएका थिए ।
प्रतिष्पर्धामा अपरेसनल सुटिङ कलाका अलाबा रातमा सुटिङ, पेस्तोल र मेसिन गन म्याच, १५ किलोको भारी बोकेर सुटिङ गर्नपर्ने लगायतका विधाहरु रहन्छन् ।
बेलायती सैन्यभित्र ख्यातिप्राप्त मेडल प्राप्त गरेपछि सार्जेन्ट तामाङले भने, “१२ वर्षे तालिममा यो उत्कृष्ट प्रदर्शन थियो । यसअघि पनि म कैयौँपटक विजयको नजिक पुगेको थिएँ ।”
उनले आफ्नो सफलताका लागि परिवारलाई धन्यवाद दिए । तालिमको दौरानमा आफू परिवारबाट टाढा रहँदा पनि परिवारले अतूल्य साथ दिएको उनले उल्लेख गर्न छुटाएनन् ।
सन् १८७४ देखि शुरु भएको प्रतियोगितामा प्रायः हरेक वर्ष गोरखा सैनिकहरुको वर्चस्व रहने गरेको छ । त्यसमा पनि इन्फेन्ट्री बटालियनहरुको बोलवाला नै रहने गर्दछ ।
सिग्नल, लजिस्टिक, इन्जिनियरिङ जस्ता कोर युनिटबाट क्वीन्स मेडल पाउने विरलै छन् । जसमा तामाङ सम्भवतः दोस्रो व्यक्ति भएको पूर्व गोरखा सैनिक गुरुङ बताउँछन् । उनका अनुसार यसअघि लजिस्टिकका देउ रानाले सो मेडल जितेका थिए ।
योर्कमा अवस्थित आफ्नो बटालियनले मेडल जितेकोमा गर्व गर्दै तामाङले अर्को वर्ष पनि सो मेडल जित्ने आशा व्यक्त गरे । “दुई वटा सिग्नल रेजिमेन्टको सहयोगले अर्को वर्ष पनि योर्कको टिमले सफलता हात पार्नेमा म आशा गर्दछु” उनले भने ।