लन्डन । बेलायतस्थित सबैभन्दा जेठो साहित्यिक संस्था नेपाली साहित्य विकास परिषद यूकेले विनाशकारी महाभूकम्पबाट पीडितलाई आर्थिक सहयोग गरेको छ । परिषदले लन्डनस्थित नेपाली दूतावासमा एकसमारोहबीच दुई हजार ६०२ पाउण्ड १० पेन्स् (करिब ४ लाख रुपैयां) कार्यवहाक राजदूत तेजबहादुर क्षेत्रीलाई प्रदान गरेको हो ।
परिषदका वरिष्ठ सहअध्यक्ष तथा राहत संयोजक कोमलप्रसाद श्रेष्ठ मल्ल र पूर्व अध्यक्ष हरिसिंह थापाद्वयको नेतृत्वमा परिषदका पदाधिकारिहरू दूतावास गएर आर्थिक सहयोग प्रदान गरेका हुन् । उक्त अवसरमा सहमहासचिव रिता गौतम, कार्यकारिणी सदस्य एभरेस्ट गौतम र बिमला गौतम लगायत साहित्यकारहरू सहभागी थिए ।
रकम हस्तान्तरणका क्रममा संयोजक मल्लले राष्ट्रिय विपदको घडीमा देश विदेशमा रहेका संघसंस्था वा व्यक्तिहरूले सहयोग गर्ने बेला आएको जनाउंदै राहत सदुपयोग र पारदर्शीतामा नेपाल सरकारले जोड दिनु पर्ने धारणा राखे । कार्यवाहक राजदूत क्षेत्रीले रकम संकलित प्रधानमन्त्री दैवी प्रकोप उद्दार कोषमा जाने प्रष्ट्याउंदै पारदर्शीतामा विश्वास गर्न आग्रह गरे ।
दूतावासमा रकम हस्तान्तरण गर्नुअघि एबीआइ कलेज एक्टनमा बसेको परिषदको कार्यकारिणी बैठकले नेपालमा महाभूकम्पमा परेर दिवंगत भएका समस्त आत्माको चीरशान्तिका लागि एक मिनेट मौनधारण गर्दै शोक प्रस्ताव पारित गरेको छ । बैठकले राहतमा नेपाल सरकारलाई सक्दो सहयोग गर्ने निर्णय समेत गरेको छ ।
बैठकले परिषदको प्रवक्तामा उपाध्यक्ष वाचस्पति रेग्मी र कार्यकारिणी सदस्यमा साधारण सदस्य विमला गौतमलाई मनोनयन गरेको छ भने कार्यकारिणी सदस्य रिता गौतमलाई सहमहासचिवमा बढुवा गरेको छ । त्यसैगरी बैठकले आगामी जुन महिनामा गर्ने तय भएको यूकेव्यापी साहित्य सम्मेलन वर्तमान देशको दुःखद परिस्थितिका कारण हाललाई स्थगित गर्ने निर्णय गरेको छ ।
परिषदका संस्थापक तथा अध्यक्ष सुरेशजंग शाहको अध्यक्षतामा बसेको बैठकमा कार्यसमिति पदाधिकारी तथा सल्लाहकारहरूको उपस्थिति थियो । उक्त बैठक व्यवस्थापन तथा जलपान प्रायोजन परिषदका सल्लाहकार तथा एबी आइ कलेजका संचालक कृष्ण भट्टले गरेका थिए ।
