लण्डन । लिम्बुवान नागरिक समाज युकेले आफ्नो स्थापनाको छैठौ वर्षको अवसर पारेर एक च्यारिटी कार्यक्रम सम्पन्न गरेको छ ।
आस्फोर्डस्थित बकहेङ्गर कम्युनिटी हलमा आयोजित उक्त कार्यक्रम संस्थाका अध्यक्ष दिल सम्बाहाम्फेको अध्यक्षता र पूर्व अध्यक्ष तथा संस्थाका सल्लाहकार प्रसाद थेबेको प्रमुख आतिथ्यता भएको थियो । कार्यक्रमका काजिमान यक्सो- किरात याक्थुङ चुम्लुङ युके, कमला लिम्बु- माङ्गेन्ना चुम्लुङ युके, सबिन तुम्बाहाम्फे- विश्व लिम्बु सांस्कृतिक महासंघ युके, छत्रसिङ तेयुङ- तेह्रथुम समाज युके, लक्ष्मी घिसिङ- ताप्लेजुङ समाज युके, बिजय लिङ्थेप- संखुवा सभा समाज युके लगायत विभिन्न सामाजिक संघ संस्थाका प्रतिनिधिहरु, समाजसेवीहरुको विशेष उपस्थिति रहेको थियो । कार्यक्रममा कार्यक्रम संयोजक डम्बर सिङगकले उपस्थित सबैलाई स्वागत गरेका थिए ।
लिम्बुवान आन्दोलनका निम्ती नैतिक र आर्थिक सहयोग जुटाउने उद्देश्यले गरिएको सो कार्यक्रम चुम्लुङ आश्फोर्ड शाखाका केलाङ समूहका कलाकारहरुहरुको च्याब्रुङ नृत्यसंगै सुरु भएको मनोरन्जनात्मक कार्यक्रममा स्थानीय कलाकार मान तबेबुङ, सुनिता थेबे र दुर्गा पाङ्माले पनि गीत गाएर मनोरन्जन दिलाएका थिए भने लन्डन ब्लान्ड्फोर्ड् निवासी रज्जु सुब्बा (इजम ) ले “एउटा बत्ती बले यहाँ धर्ति जगमगाउछ”, “उडु कि गुडु म” जस्ता चर्चित नेपाली गीतको बोलमा नृत्य प्रस्तुत गरेर कार्यक्रममा रोचकता थपेकी थिइन् । कार्यक्रममा चुम्लुङ आस्फोर्ड ब्रान्चका अध्यक्ष पूर्ण मादेन र सेरु लिम्बुले राफल ड्र सन्चालन गरेका थिए ।
“लिम्बुवान” एउटा ऐतिहासिक भुगोलको नामलाई कुनै जातिसँग ऐतिहासिक पृष्ठभूमि मिल्न जाँदैमा जातिय रङ भरेर पहिचानलाई ओझेलमा पारिएको र अहिलेको राजनीतिका विभिन्न वादहरुले आदिवासी जनजातिहरुको पहिचानका मुद्दाहरु बर्बाद मात्र बनाएको गुनासो प्रमुख अतिथि प्रसाद थेबेले पोखे । लिम्वुवानका राजनितिक पार्टीहरु एक नभै लिम्वुवानी राज्य स्थापनाको माग सम्भव हुन नसक्नेमा अध्यक्ष दिल सम्बाहाम्फेले जोड दिए ।
