लन्डन । फार्नवोरोस्थित एक भूपू गोर्खाले गुड नेवर अवार्ड २०१५ पाएका छन् । ६८ वर्षीय मान गुरुङले ह्याम्पसायर काउन्टी काउन्सिलबाट प्रदान गरिने उक्त अवार्ड प्राप्त गरेका हुन् । ११ औं गुड नेवर अवार्ड गत २८ अप्रिल विनचेष्टरस्थित ग्रेट हलमा विशेष समारोहबीच प्रदान गरिएको थियो ।
ह्याम्पसायरका छिमेकी र स्वयंसेवकहरुले समुदाय र आफ्ना लागि गरेको योगदानका आधारमा कुनै व्यक्तिलाई मनोनयन गरेपछि उक्त अवार्ड दिइन्छ ।
‘अवार्ड पाएकामा मलाई औधि खुशी लागेको छ’, गुरुङले भने, ‘समारोह पनि भव्य थियो, मलाई यसमा गर्व छ ।’
छिमेकी बारबरा एल्डेले आफ्नो तीनवटा मुख्य अप्रेशन भएका बेला चिकित्सकसम्म जाने, प्रिस्सक्रिप्सन संकलन र सपिङ समेत गरिदिएको भन्दै गुरुङलाई मनोनयन गरेकी थिइन् । ‘गुरुङले गार्डेनको रेखदेखदेखि कहिलेकाहीं म असक्त महशुस हुंदा पनि उनले आत्मैदेखि सहयोग गरे’, एल्डेले भनेकी छिन् ।
सन् २००६ यता फार्नवोरो बस्दै आएका गुरुङ ६८ वर्ष लागेपनि बडो सक्रिय छन् । उनकै शब्दमा उनलाई कहिलेकाहीं आफू २० को हाराहारीमै छु जस्तो महशुस हुन्छ रे ।
ह्याम्पसायर काउन्टि काउन्सिलले एज कन्सर्न ह्याम्पसायर, ब्रेन्डोन केयर क्लव ह्याम्पसायर, केयरर्स टुगेदर, द गुड नेवर्स सपोर्ट सर्भिस् र दि रोयल भोलुन्टरी सर्भिस्को साझेदारीमा अवार्ड वितरण गरेको हो । यसपटक अवार्डबाट विभिन्न समुदायका ४० जना सम्मानित भएका छन् ।
तस्विरः गेट ह्याम्पसायर
