जोआनाले उठाइन् ३३ मिलियन पाउण्ड, ८७ हजार ब्रिटिश जनताको सहयोग

लन्डन । भूपू गोर्खाहरुकै शब्दमा गोर्खाली चेली जोआना लुम्लेको नेपाल साइनो अझ दरिलो भएको छ । गोर्खा न्यायिक अभियानमार्फत समस्त भूपू गोर्खाहरुलाई आवासीय अधिकार दिलाउन कम्ती योगदान रहेन यी ब्रिटिश अभिनेत्रीको ।

सन् २००९ मा आवासीय अधिकार दिलाइदिएपछि धेरैले ठाने, आफ्ना पिताले गोर्खा राइफल्स् अन्तर्गत १८ वर्ष गोर्खाहरुका साथ दोश्रो विश्वयुद्ध लडेका कारण उनी गोर्खाहरुसंग झन् बढि समर्पित भइन् । तर, यथार्थमा उनी गोर्खाहरुप्रतिमात्र होइन, समस्त नेपाल र नेपाली भनेपछि हुरुक्क छन् भन्ने कुरा अहिले विपत्तिको घडीमा प्रमाणित भएको छ ।

भूकम्प पीडितहरुका लागि उनले गरेको ‘नेपाल अर्थक्वेक अपिल’ बाट शनिवारसम्म ३३ मिलियन पाउण्ड संकलन भएको छ । १३ प्रमुख यूके सहायता च्यारिटीहरुलाई एकै ठाउं ल्याएको डिजास्टर्स इमरजेन्सी कमिटी (डिइसी) का अनुसार, ८७ हजार ब्रिटिश जनताले उक्त रकम सहयोग गरेका हुन् ।

लुम्लेको राहत संकलन अभियानमा एकै दिन करिब तीन अर्ब रुपैयां संकलन भएको थियो । अभियानलाई बेलायतकी महारानी र युवराज चाल्र्सको समेत समर्थन छ ।

कमिटीका कार्यकारी निर्देशक सालेह सइदले बेलायती जनताले प्राकृतिक विपत्तिबाट जीवन तहसनहस भएका मानिसहरुलाई सहयोग गरेर फेरि एकपटक उदार मन देखाएको बताएका छन् ।

हजारौं वर्षदेखिको प्राचीन संस्कृति बोकेको मुलुक नेपाल भूकम्पको केही सेकेण्डको झट्काले त्यसको इतिहास माटोमा मिलाइदिएकोमा उनी निराश छिन् । उनको 
रोदनयुक्त अनुनय बेलायती लोकप्रिय टिभी च्यानलहरु बीबीसी, आइटिभी, च्यानल फोर, च्यानल ५ र स्काइमा बजेपछि बेलायती जनता चन्दा दिन 
तंछाडमंछाड गरे । सहयोग अपिल गरिरहंदा उनको मन कत्ति खुशी देखिन्न । पर्दाहरुमा उनको रोमाण्टिक दृश्य हेरिरहेका दर्शकले अपिलमा उनको भित्री रोदन स्पष्ट चाल पाउनेछन् । ‘केही दिन यता तपाईं हजारौंले नेपालको अकल्पनीय तस्विर देखिरहनुभएको छ । म त्यो ह्दय विदारक दृश्य देखेर बडो दुःखी छु’, अपिलमा उनले भनेकी छिन्, ‘नेपाली सार्है कोमल ह्दयका हुन् तर यो विपत्तिले उनीहरुमाथि कडा प्रहार गरेको छ ।’ जोआनाले नेपालीहरुलाई यतिखेर मानवीय सहयोग अति आवश्यक परेको जनाउंदै यसमा बेलायती नागरिकलाई सघाउन अपिल गरेकी थिइन् ।

आफ्नो अभियानमा बेलायतको पूर्ण समर्थनले आफूलाई गर्व लागेको जोआनाले बताएकी छिन् । ‘वास्तवमा यो अप्रत्यासित नतिजा हो’, उनले भनेकी छिन्, ‘मलाई 
मेरो देशप्रति गर्व छ ।’ उनले नेपाल अहिले युद्धभूमि जस्तै भएको उल्लेख 
गर्दै सहायता रकम वालवालिकाको जीवन सुचारु गर्न खर्चनुपर्नेमा जोड दिएकी 
छिन् ।

संयुक्त राष्ट्रसंघले भूकम्पबाट करिब ८० लाख नेपाली प्रभावित भएको जनाउंदै अन्तर्राष्ट्रिय समुदायबाट दुईसय ७४ मिलियन पाउण्ड सहयोग आग्रह गरेको थियो ।