तस्वीर : शिव भण्डारी
लण्डन । ख्यातिप्राप्त चिकित्सक तथा पूर्व स्वास्थ्य मन्त्री डा. उपेन्द्र देवकोटाले भुकम्प पीडितलाई उपचार गर्नका लागि नेपालमा चिकित्सकको अभाव नरहेको बताएका छन् ।
लण्डनस्थित नेपाली दूतावासले शनिबार आयोजना गरेको पत्रकार सम्मेलनमा उपस्थित भएका डा. देवकोटाले भुकम्पमा घाइते भएकाहरुलाई औषधि, पाल, खानेकुरा र अस्थायी बसोबास अत्यावश्यक रहेको तर स्वास्थ्यकर्मीको अभाव नरहेको बताए । शाहीकालमा स्वास्थ्यमन्त्री समेत रहेका देवकोटाले दलहरुले राम्रो समन्वय गरेर काम गर्न नसकेको आरोप पनि लगाए ।
कार्यबाहक राजदुत तेजबहादुर क्षेत्रीले दूतावासको पहलमा गठित नेपाल ब्रिटेन राहत तथा उद्धार कोषले हालसम्म गरेका कामहरुको बारेमा जानकारी दिँदै औषधि र पालहरु उठाउन पहल गरेको बताए ।
उनले नेपालमा व्यक्तिगत तवरमा संकलन गरिएको राहत सरकारले लिने निर्णयबारे जानकारी दिँदै राहत दुरुपयोग रोक्न सरकारले त्यसो गरेको भन्दै बचाउ गरे । तर युकेमा व्यक्तिगत र संस्थागत प्रयासमा राहत संकलन गरिरहेकाहरुलाई दूतावासमार्फत मात्र राहत नेपाल पठाउन भनेर भन्न नसकिने उनले बताए । “कमसेकम दूतावासलाई राहतका बारेमा जानकारी दिनुहोस्” उनले भने ।
एनआरएनए युकेका अध्यक्ष महेन्द्र कँडेलले एनआरएनए युकेले केही गरेन भन्ने प्रचारवाजीको खण्डनमा समय खर्चेका थिए । उनले एनआरएन आइसिसीको मातहतमा रहेर अनि युकेस्थित अक्सफाम जिबीसित मिलेर एनआरएनए युकेले राहत संकलन गरिरहेको सफाइ दिए ।
एनआरएनए युकेका पूर्व अध्यक्ष मेजर रिटायर्ड डमर घलेले कोषले दूतावासमा स्थापना गरेको कल सेन्टरले हालसम्म ८०० कल प्राप्त गरेको जानकारी दिए ।
एनआरएनए युकेका पूर्व अध्यक्ष सूर्य गुरुङले कोषमा हालसम्म १६ हजार ८९६ पाउण्ड उठेको जानकारी दिए भने नेपलिज नर्सेस एसोसिएसन अध्यक्ष सुशीला कार्कीले एसोसिएसनले १४ हजार पाउण्ड राहत संकलन गरेको र नेपाल गएका नर्सहरुले ३ हजार बिरामी जाँचेको बताइन् ।
पत्रकार सम्मेलनमा एनअारएनए युकेका पूर्व अध्यक्ष कुल आचार्य, एनअारएनएका पूर्व महासचिवहरु भक्त गुरुङ र रामशरण सिंखडा र सुवास अधिकारी लगायतले आफ्ना धारणा राखेका थिए ।
